जैवाळ यांची तालुका अध्यक्षपदी निवड
जालना : प्रहार लिपिकवर्गीय कर्मचारी संघटनेच्या जालना तालुकाध्यक्षपदी कृष्णा जैवाळ तर सचिवपदी श्रीहरी सोळंके यांची नियुक्ती करण्यात आली आहे. जिल्हाध्यक्ष सचिन दांडगे यांच्या अध्यक्षतेखाली आयोजित बैठकीत ही निवड करण्यात आली. यावेळी प्रहार संघटनेचे राज्य संपर्क प्रमुख संतोष राजगुरू, जिल्हा उपाध्यक्ष गोलांडे, सचिव डी.एस. साबळे आदींची उपस्थिती होती.
अंतरवाली येथे महंत भोजने बाबांचे स्वागत
अंबड : तालुक्यातील अंतरवाली सराटी येथे महंत भोजने बाबा यांनी भेट दिली. त्यावेळी ग्रामस्थांच्या वतीने ढोल-ताशांच्या गजरात त्यांचे स्वागत करून मिरवणूक काढण्यात आली. यावेळी महंत बठाणकर बाबा कोल्हे, चक्रपाणीबाबा, सुधाकर बाबा नागराज, गोविंदराज गुर्जर आदींची उपस्थिती होती. गावातील श्री दत्त प्रसादीक भजनी मंडळाने भजन सादर करीत या मिरवणुकीत सहभाग नोंदविला.
महावितरण विरोधात आंदोलनाचा इशारा
हसनाबाद : कोणतीही पूर्वसूचना न देता, कृषिपंपाचा विद्युत पुरवठा खंडित केला जात आहे. त्यामुळे शेतकऱ्यांची गैरसोय होत आहे. त्यामुळे महाविरणकडून तत्काळ वीजपुरवठा सुरळीत करावा, अन्यथा आंदोलन केले जाईल, असा इशारा हसनाबाद व परिसरातील शेतकऱ्यांनी निवेदनाद्वारे दिला आहे. हसनाबाद येथील कार्यालयात निवेदन देताना गजानन इंगळे यांच्यासह परिसरातील शेतकरी उपस्थित हेाते.
बंदींना भेटण्याची प्रशासनाकडून परवानगी
जालना : कोरोनाच्या पार्श्वभूमीवर कारागृहातील बंदींना नातेवाइकांना भेटण्यासाठी मनाई करण्यात आली होती. गत काही दिवसांपासून कोरोनाचा संसर्ग कमी झाला आहे. लॉकडाऊनमध्येही शिथिलता देण्यात आली आहे. त्यामुळे जिल्हाधिकारी रवींद्र बिनवडे यांनी कारागृहातील कैद्यांना भेटण्यास त्यांच्या नातेवाईकांना परवानगी दिली आहे. त्यामुळे नातेवाइकांची होणारी गैरसोय दूर करण्यात आता मोठी मदत होणार आहे, शिवाय पोलिसांची डोकेदुखीही थांबणार आहे.
चोरट्यांनी पळविली दानपेटीतील रक्कम
भोकरदन : तालुक्यातील तडेगाव येथील समर्थ पांडुरंग संस्थानच्या मंदिरातील दानपेटी शुक्रवारी रात्री चोरट्यांनी फोडली. यावेळी चोरट्यांनी दानपेटीतील जवळपास ७५ हजार रुपयांची रोकड लंपास केली. ही घटना शनिवारी सकाळी समोर आली. या प्रकरणी मधुकर मुगुटवार यांनी दिलेल्या तक्ररीवरून अज्ञात चोरट्यांविरुद्ध भोकरदन पोलीस ठाण्यात गुन्हा दाखल करण्यात आला आहे. या घटनेचा अधिक तपास पोलीस कर्मचारी सुरडकर हे करीत आहेत.