अमेरिकेचे राष्ट्रपती आणि टेस्ला कंपनीचे मालक एलन मस्क यांच्यात सध्या वाद सुरू आहेत. त्यातच मस्क यांनी केलेल्या विधानामुळे अमेरिकेतली राजकीय वर्तुळात खळबळ माजली आहे. जर मी डोनाल्ड ट्रम्प यांचे समर्थन केले नसते तर राष्ट्रपतीपदाच्या निवडणुकीत हरले असते. त्या परिस्थितीत डेमोक्रॅट्सना प्रतिनिधी सभेत बहुमत मिळाले असते. रिपब्लिकन पक्षाला सिनेटमध्ये फक्त ५१-४९ मतांनी आघाडी मिळाली असती असा दावा मस्क यांनी केला आहे.
एलन मस्क यांनी अशावेळी हे विधान केले आहे जेव्हा त्यांच्यात आणि अमेरिकेचे राष्ट्रपती डोनाल्ड ट्रम्प यांच्यात नव्या कर विधेयकावरून शा‍ब्दिक वाद रंगला आहे. ट्रम्प यांनी मस्क यांच्यावर हल्लाबोल करत नव्या कर विधेयकात इलेक्ट्रिक वाहनांना मिळणारी सूट रद्द करण्यात आली त्यामुळे ते नाराज आहेत असं म्हटलं. डोनाल्ड ट्रम्प म्हणाले की, मी कायम एलनला पसंत करतो, एलन यांनी माझ्यावर टीका करावी परंतु विधेयकावर नको. कारण हे विधेयक खूप चांगले आहे. आम्ही ईव्हीचे आदेश हटवला ज्यात इलेक्ट्रिक वाहनांना खूप पैसे मिळत होते हा मस्क यांना त्रास आहे. ईव्ही सेक्टर आधीच अडचणीत आहे आणि आता त्यांना आमच्याकडून अब्जो डॉलर अनुदान हवंय असं ट्रम्प यांनी सांगितले.
तसेच एलन आणि माझ्यात खूप चांगले संबंध होते. पुढेही ते संबंध राहतील की नाही मला माहिती नाही. मस्क यांनी व्यक्तिगत माझ्याविषयी वाईट म्हटलं नाही. परंतु मी त्याच्यावर निराश आहे असंही डोनाल्ड ट्रम्प यांनी म्हटलं. तर या विधेयकाचा परिणाम अमेरिकन शेअर बाजारात टेस्ला कंपनीच्या शेअरवरही दिसून आला. गुरुवारी टेस्ला कंपनीचे शेअर्स ८.४४ टक्क्यांनी घसरले. मागील २-३ दिवसांपासून इलेक्ट्रिक वाहन उत्पादन करणाऱ्या टेस्ला कंपनीच्या शेअर्समध्ये २८ टक्क्यांची घट दिसून आली आहे.
"माझ्याशिवाय निवडणूक जिंकली नसती"
डोनाल्ड ट्रम्प यांच्यावर मस्क यांनी खोचक विधान केले. इतिहासात कधीही असा कायदा बनला नाही जो बिग आणि ब्यूटीफूल दोन्ही असेल हे प्रत्येकाला माहिती आहे. एकतर BIG आणि UGLY विधेयक मिळेल अथवा SLIM आणि BEAUTIFUL...माझ्या विना डोनाल्ड ट्रम्प निवडणुकीत हरले असते. डेमोक्रेटसचं सभागृहात वर्चस्व असते. रिपब्लिकनच्या सिनेटमध्ये ५१-४९ जागा असत्या असं सांगत मस्क यांनी ट्रम्प यांचा कृतघ्न म्हणून उल्लेख केला.