कीव्ह (युक्रेन) : रशियाने शुक्रवारी सकाळी युक्रेनची राजधानी कीव्हसह इतर शहरांवर केलेल्या भयंकर हल्ल्यांत ४ ठार, तर २० जखमी झाले. या हल्ल्यात रशियाने ४० क्षेपणास्त्रे आणि ४०० हून अधिक ड्रोनचा वापर केल्याचे युक्रेनच्या सूत्रांनी म्हटले आहे.
अनेक शहरांत कित्येक तास स्फोटांचे आवाज येत होते. या हल्ल्यांमुळे कित्येक इमारतींमधून आगीचे लोळ उठलेले दिसत होते. दरम्यान या हल्ल्यानंतर इमारतींसह ढिगाऱ्यांमध्ये शोधमोहिमेसह बचावकार्य सुरू असल्याचे कीव्हचे महापौर विताली क्लित्स्को यांनी म्हटले आहे.
हवाई सुरक्षा प्रणालीने रशियाच्या अनेक क्षेपणास्त्रे व ड्रोनना लक्ष्य केले. याचे जळते अवशेष नागरी वस्त्यांवर पडल्याने अनेक भागांत आग लागली. या हल्ल्यांत युक्रेनचे प्रचंड नुकसान झाले असल्याचे वृत्त असून कित्येक ठिकाणी मदत व बचाव कार्य सुरू आहे.
डोनाल्ड ट्रम्प यांचे वक्तव्य अन् रशियाचे हल्ले
अमेरिकी राष्ट्राध्यक्ष डोनाल्ड ट्रम्प यांनी या युद्धावर तोडगा काढण्याचे प्रयत्न अपयशी ठरल्यानंतर बुधवारी एक वक्तव्य केले होते. या दोन्ही देशांना शांतता प्रस्थापित करण्याच्या दिशेने पुढाकार घेण्यापूर्वी काही काळ मनसोक्त लढू देणेच योग्य ठरेल, असे त्यांनी म्हटले होते. यानंतर काही तासांतच रशियाने हे हल्ले केले आहेत.