नेपाळमध्ये Gen Z सरकार? निकालात बालेन शाह यांची मोठी लाट; ओली अन् नेपाली काँग्रेसचा धुव्वा

नेपाळमध्ये एकूण २७५ जागांसाठी निवडणूक होत आहे. यातून थेट मतदानाच्या माध्यमातून १६५ सदस्य निवडले जातील आणि उर्वरित ११० सदस्य Proportional Represenation कोट्याने निवडले जाणार आहेत.

काठमांडू - नेपाळमधील निवडणुकीचे निकाल हळूहळू आता समोर येऊ लागले आहेत. या निकालात बालेन शाह यांची जबरदस्त लाट दिसून येत आहे. सुरुवातीच्या निकालात बालेन शाह यांची राष्ट्रीय स्वतंत्र पार्टी आघाडीवर आहे तर इथल्या जुन्या पक्षांना मोठे नुकसान होताना दिसत आहे. 

आतापर्यंतच्या माहितीनुसार, ६१ जागांवर मतमोजणी सुरू आहे. त्यातील ५२ जागांवर बालेन शाह यांचा पक्ष आघाडीवर आहे. नेपाली काँग्रेस ५ आणि यूएमएल ४  जागांवर पुढे आहे. ओली यांच्यासह अनेक माजी पंतप्रधान, उपपंतप्रधान आणि मंत्री मतमोजणीत पिछाडीवर असल्याचे समोर आले आहे. नेपाळमध्ये गुरुवारी लाखो लोकांनी मतदान केले. Gen Z च्या हिंसक आंदोलनानंतर देशात पहिल्यांदाच सामान्य निवडणूक होत आहे. या आंदोलनामुळे देशात केपी शर्मा ओली यांच्या नेतृत्वातील आघाडी सरकार पडले होते. या निवडणुकीत भ्रष्टाचाराचा मुद्दा प्रामुख्याने चर्चेत होता.

नेपाळच्या या निवडणुकीकडे भारताचेही बारीक लक्ष आहे. गेल्या वर्षी असामान्य परिस्थिती असूनही निवडणूक कार्यक्रम यशस्वीरित्या आयोजित केल्याबद्दल आम्ही पंतप्रधान सुशीला कार्की, नेपाळ सरकार आणि लोकांचे तसेच विविध घटकांचे अभिनंदन करतो असं भारताच्या परराष्ट्र खात्यातील प्रवक्त्यांनी सांगितले आहे. नेपाळमध्ये ६० टक्के मतदान झाले आहे. 

बालेन शाह यांची लाट

प्रसिद्ध रॅपर आणि इंजिनिअर म्हणून पुढे आलेले बालेन शाह यशस्वी राजकारणी म्हणून उभे राहिले आहेत. काठमांडूचे महापौर म्हणूनही त्यांनी काम केले आहे. बालेन शाह यांच्या नेतृत्वात राष्ट्रीय स्वतंत्र पार्टी(RSP) या नवीन पक्षाने देशातील सर्वात जुन्या २ राजकीय पक्षांचा अक्षरश: धुव्वा उडवला आहे. २०२२ मध्ये स्थापना झालेल्या आरएसपीला निवडणुकीच्या प्रचारात जनतेचा प्रचंड पाठिंबा मिळाला. बालेन शाह हे पंतप्रधानपदाचे प्रमुख दावेदार मानले जातात. नेपाळमध्ये एकूण २७५ जागांसाठी निवडणूक होत आहे. यातून थेट मतदानाच्या माध्यमातून १६५ सदस्य निवडले जातील आणि उर्वरित ११० सदस्य Proportional Represenation कोट्याने निवडले जाणार आहेत. १६५ जागांसाठी ३४०० उमेदवार निवडणूक लढवत होते तर PR च्या माध्यमातून ११० जागांसाठी ३१३५ उमेदवार रिंगणात होते.

कोण आहे बालेन शाह?

बालेन शाह हे प्रसिद्ध रॅपर आणि संगीतकार आहेत. त्यांचे अनेक टीव्ही शो, रॅप आणि म्युझिक व्हिडिओ समोर आलेत. युवकांमध्ये त्यांची क्रेझ अधिक आहे. बालेन शाह यांची जीवनशैली कायम चर्चेत असते. त्यांच्याकडे लग्झरी वाहने आहेत. ज्यात सुझूकीसारख्या मॉडेलचा समावेश आहे. २०२३ साली बालेन शाह यांचा टाईम मॅग्जिनच्या १०० प्रतिष्ठित लोकांच्या यादीत समावेश झाला होता. त्यांचा जन्म २७ एप्रिल १९९० साली काठमांडू येथे झाला होता. बालेन यांनी मास्टर्स कर्नाटकच्या इंजिनिअरींग कॉलेजमधून केले होते. शाह यांनी कचऱ्याचे नियोजन, पारदर्शी शासन, शहराचा विकास आराखडा, डिजिटल प्रशासन, युवकांचे संरक्षण यावर काम केले त्यामुळे आज त्यांच्या मागे युवकांची मोठी फौज आहे.