क्वालालंपूर- मलेशियाचे माजी पंतप्रधान आणि भ्रष्टाचाराचे आरोप झाल्यानंतर निवडणुकीत पराभूत झालेल्या नजीब रजाक यांच्या अडचणींमध्ये वाढ झाली आहे. महाथिर मोहंमद यांच्या नेतृत्त्वाखाली नवे सरकार मलेशियामध्ये अस्तित्त्वात आल्यावर नजीब आणि त्यांची पत्नी यांना देश सोडण्यास मनाई करण्यात आली. त्यानंतर त्यांच्या दोन निवासस्थानांवर छापे टाकण्यात आले. या छाप्यांमध्ये पैसे आणि दागिने भरलेल्या हँडबॅग्ज सापडल्या असून शेकडो महागड्या पर्स जप्त करण्यात आल्या आहेत.
नजीब यांचा पराभव 92 वर्षांचे मलेशियन नेते महाथिर मोहंमद यांनी केला. ते लोकशाही पद्धतीने निवडून येणारे जगातील सर्वात वयोवृद्ध नेते आहेत. नजीब यांनी मलेशियात 1 मलेशिया डेव्हलपमेंट बर्हार्ड (1एमडीबी ) योजनेत कोट्यवधी डॉलर्सचा भ्रष्टाचार केला असे सांगण्यात येते. महाथिर याबाबत बोलताना म्हणाले होते, ''आम्ही नजीब यांचा राजकीय सूड वगैरे घेण्याच्या विचारात नाही तर आम्ही कायद्याचे राज्य स्थापन करणार आहोत, जर नजीब यांनी काहीतरी चुकीचं केल्याचं कायद्याद्वारे सिद्ध झालं तर त्यांना परिणाम भोगावेच लागतील.'' नजीब आणि त्यांच्या पत्नीवर देश सोडण्याची मनाई केल्यानंतर नजीब यांनी ट्वीट करुन आपण सरकारच्या निर्णयाचा आदर करतो असे म्हटले आहे.