Donald Trump on Elon Musk: अमेरिकेचे राष्ट्राध्यक्ष डोनाल्ड ट्रम्प आणि टेस्लाचे मालक इलॉन मस्क यांच्यातील वाद तूर्तास तरी मिटण्याची चिन्हे नाहीत. डोनाल्ड ट्रम्प हे इलॉन मस्कशी तडजोड करण्याच्या मनःस्थितीत नसल्याचे दिसत आहे. मला मस्कशी संबंध सुधारण्याची कोणतीही इच्छा नाही, असं ट्रम्प यांनी शनिवारी स्पष्ट केले. यासोबतच त्यांनी मस्क यांना गंभीर इशाराही दिला. जर मस्क यांनी येत्या निवडणुकीत डेमोक्रॅट्सना मदत करण्याचा प्रयत्न केला तर त्याचे गंभीर परिणाम भोगावे लागतील, असंही ट्रम्प यांनी म्हटलं.
डोनाल्ड ट्रम्प दुसऱ्यांदा अमेरिकेचे राष्ट्राध्यक्ष झाल्यापासून ते त्यांच्या धोरणांमुळे चर्चेत आहेत. ट्रम्प यांनी उचलेल्या पावलांमुळे त्यांना टीकेला तर सामोरे जावेच लागले पण त्यांच्यासोबत असलेल्या अब्जाधीश इलॉन मस्क यांनीही त्यांची साथ सोडली. त्यानंतर दोघांनाही एकमेकांवर जोरदार टीका केली. मात्र आता ट्रम्प यांनी मस्क यांना उघडपणे इशारा दिला आहे. डोनाल्ड ट्रम्प यांनी मस्कबद्दल विचारही करत नसल्याचे म्हटले आहे. सीएनएनशी बोलताना ट्रम्प यांनी मी काही काळ मस्कशी बोलणारही नाही, असं म्हटलं आहे. इलॉन मस्क यांनी ट्रम्प सरकारमधून पायउतार झाल्यापासून उघडपणे त्यांचा विरोध सुरु केला आहे. गुरुवारी रात्री मस्क आणि ट्रम्प यांच्यात जोरदार वाद झाला होता. वाद इतका वाढला की मस्क यांनी ट्रम्प यांना पदावरून हटवण्याची इच्छा व्यक्त केली होती.
माझ्या मदतीशिवाय ट्रम्प यांनी निवडणूक जिंकली नसती, असं मस्क यांनी म्हटलं होतं. ट्रम्प यांच्या 'बिग ब्युटीफुल बिल' ला पैशाचा अपव्यय म्हणत इलॉन मस्क सरकारमधून बाहेर पडले होते. मस्क यांच्या टीकेवर सुरुवातीला ट्रम्प यांनी मौन बाळगलं होतं. त्यानंतर आता डोनाल्ड ट्रम्प यांनी मस्क यांच्याशी समेट करण्यास नकार दिला आहे. तसेच जर मस्क यांनी कर कपात विधेयकाच्या बाजूने मतदान करणाऱ्या रिपब्लिकन उमेदवारांविरुद्ध निवडणूक लढवण्यासाठी डेमोक्रॅटिक उमेदवारांना आर्थिक मदत केली तर त्याचे अतिशय गंभीर परिणाम भोगावे लागतील असा इशारा ट्रम्प यांनी मुलाखतीमध्ये दिला. "जर त्यांनी असे केले तर त्याला खूप गंभीर परिणाम भोगावे लागतील," असं ट्रम्प म्हणाले.
इलॉन मस्क यांच्यासोबतचे तुमचे संबंध संपल्याचे वाटते का असं विचारले असता, ट्रम्प यांनी, "हो, मलाही तसेच वाटते," असं म्हटलं. लवकरच मस्कशी बोलण्याची माझी कोणतीही योजना नसल्याचे डोनाल्ड ट्रम्प यांनी स्पष्ट केले. 'मी इतर गोष्टींमध्ये खूप व्यस्त आहे, माझा त्यांच्याशी बोलण्याचा कोणताही हेतू नाही,' असंही ट्रम्प म्हणाले.