रशिया आणि युक्रेन यांच्यातील संघर्ष शांत होण्याऐवजी अधिकच चिघळत चालला आहे. युक्रेनने दक्षिण रशियातील एका प्रमुख गॅस प्रक्रिया प्रकल्पाला लक्ष्य करत ड्रोन हल्ला केला आहे. या हल्ल्यामुळे कझाकस्तानहून होणारा गॅसचा पुरवठा तात्पुरता थांबवावा लागला आहे, अशी माहिती रशियन अधिकाऱ्यांनी रविवारी दिली.
गॅझप्रॉमचा ४५ अब्ज क्यूबिक मीटरचा प्रकल्प उद्ध्वस्त
ओरेनबर्ग येथे असलेला हा गॅस प्रकल्प जगातील सर्वात मोठ्या गॅस उत्पादन आणि प्रक्रिया केंद्रांपैकी एक आहे. याची वार्षिक क्षमता ४५ अब्ज क्यूबिक मीटर असून, तो कझाकस्तानच्या कराचगनाक भागातून येणाऱ्या 'गॅस कंडेन्सेट'वर प्रक्रिया करतो. रशियाची सरकारी कंपनी गॅझप्रॉम याचे संचालन करते. प्रादेशिक गव्हर्नर येवगेनी सोलंतसेव यांच्या माहितीनुसार, ड्रोन हल्ल्यांमुळे प्रकल्पातील एका कार्यशाळेत आग लागली आणि प्रकल्पाच्या काही भागाचे मोठे नुकसान झाले. कझाक ऊर्जा मंत्रालयानेही याची पुष्टी करत, हल्ल्यामुळे गॅझप्रॉमला कझाक गॅसवर प्रक्रिया करणे तात्पुरते शक्य नसल्याचे स्पष्ट केले आहे. युक्रेननेही ओरेनबर्ग प्रकल्पात आग लागल्याचा आणि गॅस शुद्धीकरण युनिटचे नुकसान झाल्याचा दावा केला आहे.
रशियाच्या 'अर्थकारणा'वर युक्रेनचा निशाणा
युक्रेनने अलिकडच्या काही महिन्यांत रशियन ऊर्जा सुविधांवर हल्ले तीव्र केले आहेत. मॉस्कोला युद्धासाठी निधी पुरवणाऱ्या आणि थेट मदत करणाऱ्या या सुविधांना लक्ष्य करून रशियाच्या अर्थकारणावर दबाव आणण्याचा युक्रेनचा प्रयत्न आहे.
ट्रम्प यांच्या वक्तव्याने खळबळ
या युद्धाच्या पार्श्वभूमीवर अमेरिकेचे राष्ट्राध्यक्ष डोनाल्ड ट्रम्प यांनी फॉक्स न्यूजला दिलेल्या मुलाखतीत मोठे विधान केले आहे. शांतता प्रस्थापित करण्यासाठी युक्रेनला रशियाने बळकावलेली काही भूमी सोडावी लागू शकते, असे संकेत त्यांनी दिले. "रशियाचे अध्यक्ष व्लादिमीर पुतिन काहीतरी घेऊनच राहतील," असे ते म्हणाले. ट्रम्प यांनी युक्रेनला 'टॉमहॉक' क्षेपणास्त्रे देण्याबाबत अनिर्णायक भूमिका घेत अमेरिकेच्या शस्त्रास्त्रांच्या साठ्याच्या संरक्षणाबद्दल चिंता व्यक्त केली.
रशियाकडून 'गाइडेड बॉम्ब'चा वापर
दुसरीकडे, युक्रेनियन अभियोजकांचा दावा आहे की, रशिया आता नागरी वस्त्यांना लक्ष्य करण्यासाठी आपल्या हवाई 'गाइडेड बॉम्ब'मध्ये बदल करत आहे. खार्किव्ह प्रदेशात रशियाने १०० ते १३० किलोमीटरपर्यंत उडू शकणाऱ्या 'UMPB-5R' या नवीन रॉकेट-आधारित बॉम्बचा वापर केला आहे. डोनिप्रोपेत्रोव्हस्क प्रदेशात रशियन ड्रोन हल्ल्यात किमान ११ लोक जखमी झाले असून, अनेक इमारतींचे नुकसान झाले आहे. तसेच, रशियाने एका कोळसा खाणीवर हल्ला केल्यानंतर १९२ खाण कामगारांना सुरक्षित बाहेर काढण्यात आले. रशियन संरक्षण मंत्रालयाने रात्रभरात युक्रेनचे ४५ ड्रोन पाडल्याचे सांगितले. तर, युक्रेनने समारा प्रदेशातील नोवोकुइबिशेव्स्क तेल रिफायनरीवर ड्रोन हल्ला केल्याचा दावा केला आहे.
Web Summary : A Ukrainian drone strike targeted a major Russian gas processing plant, disrupting gas supplies from Kazakhstan. The attack damaged a Gazprom facility, prompting temporary shutdowns. Trump suggested Ukraine might cede land for peace. Russia is also adapting guided bombs for civilian targets, escalating conflict.
Web Summary : यूक्रेन ने रूसी गैस प्रोसेसिंग प्लांट पर ड्रोन से हमला किया, जिससे कजाकिस्तान से गैस की आपूर्ति बाधित हुई। हमले में गज़प्रोम की सुविधा क्षतिग्रस्त हुई, जिससे अस्थायी रूप से कामकाज रुका। ट्रंप ने कहा कि शांति के लिए यूक्रेन को भूमि छोड़नी पड़ सकती है। रूस नागरिकों पर निर्देशित बमों का उपयोग कर रहा है।