पॅरिस - कोरोना विषाणूच्या फैलावामुळे संपूर्ण जगभरातील मानवी जीवनावर विपरित परिणाण झाला आहे. कोरोनाकाळात अनेक उद्योगधंद्यांसह मनोरंजनाची साधने असलेली थिएटर्ससुद्धा बंद ठेवावी लागली होती. दरम्यान, ही थिएटर्स उघडण्याची मागणी करत एक अभिनेत्री चक्क भर स्टेजवर न्यूड झाल्याची घटना फ्रान्समध्ये घडली आहे. (The actress went nude on stage to demand the reopening of theaters that were closed during the Corona period)
फ्रान्समधील एका अभिनेत्रीने थिएटर्स उघडण्याची आपली मागणी सरकारपर्यंत पोहोचावी यासाठी वेगळ्या पद्धतीने आंदोलन केले. त्यासाठी तिने एका पुरस्कार सोहळ्याच्या मंच निवडला. तिथे तिने भर स्टेजवर आपल्या अंगावरचे कपडे उतरवले. कोरोनाकाळात कला आणि संस्कृती जपण्यासाठी सरकारने पुढाकारा घेतला पाहिजे, असे आवाहन तिने केले.
कोरेन मासिरो असे या ५७ वर्षीय अभिनेत्रीचे नाव आहे. तिने सिझर पुरस्कार सोहळ्यात हे आंदोलन केले. सिझर पुरस्काराला फ्रान्समध्ये ऑस्कर एवढेच महत्त्व आहे. त्यामुळे तिने या पुरस्कार सोहळ्याचा आंदोलनासाठी निवड केली. कोरोनामुळे फ्रान्समध्ये गेल्या तीन महिन्यांपासून चित्रपटगृहे बंद आहेत. दरम्यान, या पुरस्कार सोहळ्यात मासिरो यांना बेस्ट कॉस्च्युमचा पुरस्कार देण्यासाठी मंचावर निमंत्रित करण्यात आले होते. मात्र त्यांनी मंचावर येत कपडे उतरवल्याने सर्वांना धक्का बसला.
दरम्यान, मासिरो यांनी आपल्या शरीरावर सरकारसाठी काही आवाहनात्मक संदेशही लिहिले होते. यापूर्वी गतवर्षी डिसेंबर महिन्यातही फ्रान्समध्ये अनेक कलाकारांनी रस्त्यावर उतरत सरकारविरोधात आंदोलन केले होते.