भुवनेश्वर, हॉकी विश्वचषक स्पर्धा: न्यूझीलंड संघाने गुरुवारी खेळलेल्या 'A' गटाच्या लढतीत स्पेनचा विजयाचा घास हिसकावला. न्यूझीलंडच्या खेळाडूंनी अखेरच्या दहा मिनिटांत दोन गोल करताना सामना 2-2 असा बरोबरी सोडवून गटात दुसरे स्थान कायम राखले. स्पेनला मात्र स्पर्धेतील आव्हान कायम राखण्यासाठी अर्जेंटिना विरुद्ध फ्रान्स यांच्यातील सामन्याकडे लक्ष ठेवावे लागेल.
फ्रान्सने दोन सामन्यांत एक पराजय व एक अनिर्णीत निकाल नोंदवला आहे. त्यांच्या खात्यात सध्या 1 गुण आहे आणि त्यांचा गोलफरकही -1 असा आहे. या गटातून दुसऱ्या व तिसऱ्या क्रमांकाच्या चढाओढीत न्यूझीलंडने 4 गुणांसह दुसरे स्थान निश्चित केले आहे. तिसऱ्या स्थानावर सध्या तरी स्पेनचा संघ असला तरी अर्जेंटिनाविरुद्धच्या निकालाने समिकरण बदलू शकते.