लघुशंकेसाठी गेलेल्या महिलेचे सोन्याचे दागिने लुटले

हिंगोली तालुक्यातील सिरसम येथील एक ४५ वर्षीय महिला गावाकडे सिरसमकडे आपल्या मुलासोबत ३० मार्च रोजी दुचाकीवर निघाली होती. त्यांची दुचाकी बासंबा फाटा परिसरात आली असता सदर महिला लघुशंकेसाठी दुचाकीवरून खाली उतरली. बाजूला अडोशाला जात असताना याच परिसरात दबा धरून बसलेल्या तिघांनी त्या महिलेला ओढत नेऊन तिच्या अंगावरील सोन्याचे दागिने लुटले. यावेळी महिलेने आरडाओरड केली असता तिच्या मुलाने धाव घेतली. त्यावेळी तिन्ही चोरट्यांनी दगडफेक करीत पळ काढला. दरम्यान, या घटनेची माहिती मिळताच उपविभागीय पोलीस अधिकारी वाखारे, स.पो.नि. राजेश मलपिलू यांनी घटनास्थळाकडे धाव घेत आरोपींचा शोध घेण्यास सुरुवात केली, तसेच याच परिसरात गस्तीवर असलेले हिंगोली ग्रामीणचे स.पो.नि. बी.आर. बंदखडके, अशोक धामणे, शे. महंमद, शेषराव पोले, पोकळे यांच्या पथकानेही धाव घेत आरोपींचा शोध सुरू केला. यावेळी बासंबा परिसरातील शेतात तिघे संशयित आढळून आले. पोलिसांनी तिन्ही संशयितांना ताब्यात घेतले असून, त्यांची विचारपूस सुरू असल्याची माहिती स.पो.नि. राजेश मलपिल्लू यांनी दिली. रात्री उशिरापर्यंत बासंबा पोलीस ठाण्यात या घटनेची नोंद झाली नव्हती.