वसमत : येथील साई गॅस एजन्सीच्या कर्मचाऱ्याला पिस्तूल दाखवून त्याच्या जवळील बॅग लांबविल्याची घटना घडली गुरुवारी सकाळच्या सुमारास घडली. भरदिवसा राष्ट्रीय महामार्गालगत हा थरार सीसीटिव्हीमध्ये कैद झाला आहे.
वसमत - नांदेड रोडवर असलेल्या साई गॅस एजनसीचे कर्मचारी गजानन डरंगे हे नेहमीप्रमाणे बँकेत पैसे भरण्यासाठी निघाले हाेते. कार्यालय रस्त्यावर अगोदरच थांबलेल्या दुचाकीस्वाराने त्यांच्यासमोर येत, एकाने पिस्तूल दाखवत डरंगे जवळील बॅगमध्ये असलेले ८६ हजार रूपये हिसकावून नांदेडच्या दिशेने पोबारा केला. भर दिवसा राष्ट्रीय महामार्गावर हा थरार घडल्याने खळबळ उडाली आहे. विशेष बाब अशी की, हा थरार सीसीटिव्हीमध्ये कैद झाला आहे.
घटनास्थळी पोलीस निरीक्षक शिवाजी गुरमे, सपोनी श्रीदेवी पाटील, पोलीस उपनिरीक्षक खार्डे यांच्यासह पथक दाखल झाले. आरोपींच्या शोधात पथक पाठवण्यात आले आहे. पाळत ठेऊन हा प्रकार झाल्याची संशय पाेलिसांनी व्यक्त केला आहे. आठ दिवसात दुसऱ्यादा बंदुकीचा धाक दाखवून लुटण्याची घटना आहे. यापूर्वी २६ जुलै रोजी वसमत- औंढा रस्त्यावरील चोंडी फाट्या जवळील पेट्रोल पंपाजवळ पंप चालकाला बंदुकीचा धाक दाखवून ८ हजार रुपये लंपास केले हाेते. याघटनेचे गांभीर्य घेतले गेले नसल्याने वसमत शहरात गुरुवारी राष्ट्रीय महामार्गावर ही घटना घडली आहे. त्यातून गुन्हेगारांची हिंमत वाढत असल्याचाच हा प्रकार आहे.