पहिल्याच दिवशी मिळणार गणवेश, पुस्तके

मोहन बोराडे, सेलू आगामी शैक्षणिक वर्षाच्या पहिल्याच दिवशी सर्व शाळांमध्ये विद्यार्थ्यांना पाठयपुस्तके आणि गणवेश वाटप करण्यासाठी गटशिक्षण विभागाने नियोजन केले असून शहरी व ग्रामीण भागातील विद्यार्थ्यांना शाळेच्या पहिल्याच दिवशी हे साहित्य वाटपाची तयारी करण्यात आली आहे़ तालुक्यातील जिल्हा परिषदेच्या शाळांतील मुली तसेच एस़सी़, एस़ टी़ व बी़पी़एलमध्ये समाविष्ठ असलेल्या विद्यार्थ्यांना प्रत्येकी दोन गणवेश व सर्व विद्यार्थ्यांना पाठयपुस्तके देण्यासाठी केंद्रीय मुख्याध्यापकांना बैठकीस उपस्थित राहण्याचे आदेश गटशिक्षणाधिकारी एस़ पी़ कुलकर्णी यांनी दिले आहेत़ तालुक्यातील ८ हजार ४२१ विद्यार्थ्यांना गणवेश खरेदीसाठी संबंधित शाळाच्या शालेय व्यवस्थापन समितीच्या खात्यावर ३३ लाख ६८ हजार ४००रूपये निधी देण्यात आला आहे़ तसेच तालुक्यातील जिल्हा परिषद व अनुदानित शाळांमधून शिक्षण घेणार्‍या २३ हजार १०० विद्यार्थ्यांना पहिल्या दिवशी पाठयपुस्तके वाटप करण्यासाठी संबंधित शाळेच्या मुख्याध्यापकांना कस्तुरबा गांधी बालिका विद्यालयाच्या इमारतीत दिलेल्या वेळे नुसार उपस्थित राहण्याचे आवाहन करण्यात आले आहे़ संगणक प्रपत्रनुसार पुस्तके मोजून घेण्यासाठी मुख्याध्यापकांना उपस्थित राहण्याच्या सूचना करण्यात आल्या आहेत़ २८ मे ते १० जून या कालावधीत मुख्याध्यापकांना नियोजनासाठी बोलविण्यात आले आहे़ २८ मे रोजी केंद्रीय प्राथमिक शाळा सेलू, २९ मे के़प्रा़शा़ कन्या सेलू, ३० मे के़प्रा़शा़ कन्या वालूर, ३१ मे के़प्रा़शा़ चिकलठाणा, २ जून के़प्रा़शा़ गिरगाव बु., ३ जून के़प्रा़शा़ कुपटा, ४ जून के़प्रा़शा़ रवळगाव, ५ जून के़प्रा़शा़ मोरेगाव, ६ जून के़प्रा़शा़ डासाळा, ७ जून नूतन विद्यालय नूतन कन्या, के.बा. विद्यालय, शारदा विद्यालय, झाकीर हुसेन माध्यमिक शाळा, ८ जून रोजी नूतन प्राथमिक, शारदा प्राथमिक, विवेकानंद प्राथमिक, न्यू हायस्कूल, यशवंत विद्यालय, ९ जून रोजी झाकेर हुसेन प्रा़ , शैलेजा प्राथमिक, शांताबाई नखाते प्रा़ आश्रम शाळा, वालूर शांताबाई नखाते माध्यमिक आश्रमशाळा व १० जून रोजी ज्ञानोपासक विद्यालय कुपटा, शांताबाई नखाते विद्यालय देवगाव, क्रांतीसिंह नाना पाटील, नितिन विद्यालय बोरगाव, पांडुरंग विद्यालय, मोरेगाव, नेताजी सुभाषचंद्र विद्यालय पिंपरी, सु़ वि़ चिकलठाणाा, के़ जी़बी़ व्ही़ सेलू व अ़ जा़ निवासी आश्रमशाळा हादगाव या शाळेच्या मुख्याध्यापकांना हजर राहण्याचे आदेश दिले आहेत़ संबंधित मुख्याध्यापक उपस्थित न राहिल्यास व त्या कारणाने विद्यार्थ्यांना पहिल्या दिवशी पुस्तके प्राप्त न झाल्यास संबंधित मुख्याध्यापकावर शिस्तभंगाची कार्यवाही करण्यात येईल, अशी गटशिक्षणाधिकारी यांनी पत्रकाद्वारे कळविले आहे़