हिंगोली : येथील मार्केट यार्डात मागील चार दिवसांत हळदीला जवळपास दोन ते अडीच हजाराने भाववाढीची झळाळी मिळाली. ११ मार्च रोजी १८ हजार ३५० रूपयांचा पल्ला गाठला. या दिवशी १ हजार ३०० क्विंटलची आवक झाली होती. तर सोयाबीन दराला मात्र उतरती कळा कायम आहे.
येथील संत नामदेव मार्केट यार्डात नव्या हळदीची आवक सुरू झाली आहे. सध्या नवीची आवक कमी असली तरी अजूनही गेल्यावर्षीची हळद शेतकऱ्यांकडे आहे. गेल्या दोन महिन्यांच्या तुलनेत आठवड्यापासून भाव वधारल्याने शेतकरी हळद विक्रीसाठी आणत आहेत. त्यामुळे मार्केट यार्डात आवक वाढली आहे. सोमवारी १ हजार ३०० क्विंटल हळद विक्रीसाठी आली होती. किमान १५ हजार १०० ते कमाल १८ हजार ३५० भाव मिळाला. मागील चार दिवसात जवळपास दोन ते अडीच हजाराने हजाराने भाव वधारल्याने उत्पादकांना दिलासा मिळाला आहे.
तर सोयाबीनची भाव कोंडी कायम असल्याने शेतकऱ्यांची निराशा होत आहे. ११ मार्च रोजी ३०० क्विंटल सोयाबीनची आवक झाली होती. ४ हजार ते ४ हजार ४०९ रूपये एवढा भाव मिळाला. तसेच ८०० क्विंटल हरभरा विक्रीसाठी आला होता. ५ हजार १५० ते ५ हजार ५०० रूपये भाव मिळाला. तर तूर सरासरी ९ हजार ८३७ रूपये क्विंटलने विक्री झाली.