सेनगाव (जि. हिंगोली): तालुक्यातील बनबरडा शिवारात एका पुलाखाली असलेल्या पाण्यात अनोळखी तरुणाचा मृतदेह ७ ऑगस्ट रोजी सकाळी दहा वाजता आढळून आला. तसेच घटनास्थळी एक दुचाकीही आढळली होती. या मारेकऱ्यांनी अत्यंत शिताफीने केलेल्या खुनाचा सेनगाव पोलिसांनी २४ तासांच्या आत मृतदेहाची ओळख पटवित मारेकऱ्यांनाही ताब्यात घेतले.
बनबरडा शिवारातील सरस्वती नालामध्ये रविवारी सकाळी शेतकऱ्यांना एक अनोळखी मृतदेह व मोटारसायकल आढळली होती. मृतदेहाच्या अवस्थेवरून मारेकऱ्यांनी धारधार शस्त्राने वार करून सदर युवकाचा खून केला असल्याचा अंदाज घटनास्थळी पोहोचलेल्या पोलीस निरीक्षक रणजित भोईटे व त्यांचा सहकाऱ्यांना आला. परंतु मयताची ओळख पटल्याशिवाय पुढे तपास सरकणार नव्हता. अशावेळी पोलिसांनी बारकाईने मृतदेहाची पाहणी करत असताना यावेळी घटनास्थळी हजर असलेले जमादार सुभाष चव्हाण यांनी मृतदेह पाहता क्षणी ओळखला. जमादार चव्हाण यांनी मृतदेह पाहताच यापूर्वी हिंगोली ग्रामीण येथे कर्तव्यावर असताना सदर मृतदेह असलेल्या युवकावर मोटारसायकल चोरीचा गुन्हा होता.
सदर युवक हा पांगरी (ता. हिंगोली) येथील हरीदास वकृजी टापरे हा असल्याचे सांगितले. त्यानंतर तपास चक्रे वेगाने फिरली. सदर युवकाचा अनैतिक संबंधातून खून झाला असल्याची शक्यता व्यक्त करण्यात आली. या प्रकरणात संशयितांना ताब्यात घेऊन पोलिसी खाक्या दाखविला. त्यात आरोपींनी अनैतिक संबंधाच्या कारणांमुळे हरदीस यांच्या डोक्यावर, मानेवर जबर वार करीत जीवे मारले. पुरावा नष्ट करण्यासाठी वाहनाद्वारे मोटारसायकलवर प्रेत घटनास्थळापासून जवळपास १०० किलोमीटर अंतरावर टाकले. परंतु पोलिसांना या खुनाचा २४ तासांत उलगडा करीत आरोपींना ताब्यात घेतले. याप्रकरणी अरविंद हरीदास टापरे यांच्या फिर्यादीवरून व्यंकटी गोविंदा मस्के, ज्ञानेश्वर बबन गिरे, संतोष नामदेव बानबुडे, आशाबाई बबन गिरे (सर्व रा. लोहगाव) यांच्या विरुद्ध खुनाचा गुन्हा दाखल करण्यात आला असल्याची माहिती पोलीस निरीक्षक रणजित भोईटे यांनी दिली.