हिंगोली: जुन्या शंभर, दहा व पाच रूपयांच्या नोटा बंद होणार असल्याचे संकेत रिझर्व्ह बँकेने दिल्याचे वृत्त प्रसारित होत आहे. मात्र यासंदर्भात बँकांना कुठल्याही सूचना मिळाल्या नसून नागरिकही बिनधास्त असल्याचे चित्र हिंगोली जिल्हाभरात पहावयास मिळत आहे. जुन्या नोटा बंद झाल्या तरी नवीन नोटा बदलून मिळतीलच की असे नागरिकांतून बोलले जात आहे.
पंतप्रधान नरेंद्र मोदी यांनी नोटबंदीचा निर्णय घेतल्यानंतर विरोधकांकडून टिकेची झोड उठली होती. आता पुन्हा जुन्या शंभर, दहा व पाच रूपयांच्या नोटा बंद करण्याचे संकेत रिझर्व्ह बँकेने दिल्याचे बातम्या प्रसारित झाल्या आहेत. मार्च किंवा एप्रिल महिण्यापर्यंत शंभर, दहा, पाच रूपयांच्या नोटा बंद होतील अशी चर्चाही नागरिकांतून होत आहे. मात्र यासंदर्भात बँकांना कुठल्याही सूचना मिळाल्या नसल्याचे अनेक बँकांचे म्हणणे आहे. त्यामुळे सध्या तरी जुन्या नोटा बंद होण्याच्या चर्चेला विराम बसला आहे. जुन्या नोटा बंद होण्याची अफवा नागरिकांपर्यंत पोहचली असली तरी बाजारपेठेतील सर्वच व्यवहार सुरळीत आहेत. तसेच व्यापाऱ्यांतूनही जुन्या नोटा स्विकारल्या जात होत्या. तसेच जुन्या नोटा जमा करण्यासाठी कोणत्याही बँकात गर्दी होताना दिसून येत नव्हती. २५ जानेवारी रोजी शहरातील सर्वच बँकांत नियमित व्यवहार सुरू असल्याचे दिसून आले.
बँकांना कोणत्याही सूचना नाहीत
जुन्या शंभर, दहा, पाच रूपयांच्या नोटा बंद होण्यासंदर्भात कोणत्याही सूचना बँकाना मिळाल्या नाहीत. बँकातही सर्व व्यवहार नियमितपणे सुरू होेते. बँक शाखा अधिकाऱ्यांना याबाबत विचारणा केली असता जुन्या नोटा बंद झाल्यासंदर्भात कोणत्याही सूचना अथवा पत्र मिळाले नसल्याचे सांगितले.
जुन्या नोटा बंद झाल्याबाबत काही चर्चा नाही. जुन्या नोटा घेणार नसल्याचे अद्याप एकाही ग्राहकांनी म्हटले नाही. जुन्या नोटांची देवाण-घेवाण सुरू आहे.
राजेश जैस्वाल, व्यापारी हिंगोली
नोटा बदलाची अफवा पसरत आहे. मात्र आमच्याकडे जुन्या नोटा घेणार नाही, असे म्हणणारे ग्राहक आले नाहीत. आम्हीही जुन्या नोटा स्विकारत असून जुन्या शंभर, दहा, पाच रूपयांचे व्यवहार सुरळीत चालू आहेत.
-अनिल नेणवाणी,व्यापारी हिंगोली
पाच, दहा, शंभराच्या जुन्या नोटा बंद होणार असल्याची अफवा बातम्यांतून ऐकिवात आहे. ग्रामीण भागात अद्याप जुन्या नोटा बंद होणार असल्याच्या संदर्भात चर्चा नाही. जरी नोटा बंद झाल्या तरी नवीन नोटा बदलून मिळतील आखाडा बाळापुरातील व्यापारी जुन्या नोटा स्विकारत असून देवाण-घेवाण सुरू आहे.
-व्यंकटेश तेलावार, अध्यक्ष, किराणा असो. आ. बाळापूर