औंढा नागनाथ : शहरात रस्ता रुंदीकरणातून होत असलेल्या सिमेंट रस्त्याचे काम सुरू आहे. मात्र, मधोमध खासगी नळाचे पाणी लिकेज होत असून याबाबत वारंवार सांगूनही दुरुस्ती केली जात नाही. त्यामुळे गुत्तेदाराने दोन ठिकाणी काम बंद केले आहे. यामुळे रस्त्याचे मोठे नुकसान होत आहे. या प्रकारामुळे नगरपंचायतने संबंधित नळ कनेक्शनधारकांवर कारवाई करण्याचा इशारा दिला आहे.
औंढा नागनाथ हे जोतिर्लिंगचे ठिकाण असल्याने नावीन्यपूर्ण योजनेतून जिंतूर-औंढा-झीरो फाटा ते पिंपळदरी फाट्यापर्यंत रस्ता रुंदीकरण व सुशोभिकरण होत आहे. पहिल्या टप्प्यातील काम झाले आहे. दुसऱ्या टप्प्यात असलेले विश्रामगृह ते जुने बसस्थानकपर्यंतच्या रस्त्याचे काम सिमेंट काँक्रिटमध्ये होत आहे. दोन्ही बाजूंनी रॉडमधून दुभाजक त्यात लाईट व सुशोभित झाडे लावण्यात येणार आहे.
सध्या हे काम प्रगतीपथावर असून अशातच ढाब्यासमोर खासगी नळ कनेक्शन आहे. मुख्य पाणीपुरवठा करणाऱ्या पाईपलाईनमधून नळाचे पाणी लिकेज होत आहे. तसेच नवीन बसस्थानकसमोरील रस्त्यावरही मुख्य पाईपलाईनमधून अनेक खासगी हॉटेलचालकांनी नळ घेतला आहे. सदरील नळातून अनेकवेळा पाणी लिकेज होत आहे. अनेकवेळा नगरपंचायतने यावर काम करून पाणी बंद केले होते. शिवाय, सार्वजनिक बांधकाम विभागाच्या वतीनेदेखील पाणी लिकेज बंद करण्यासाठी पत्रव्यवहार केला आहे. परंतु, सदरील कनेक्शन खासगी असल्याने तेवढ्या गांभीर्याने घेतले जात नाही. त्यामुळे सतत पाणी लिकेजमुळे सिमेंट काँक्रिटचे काम करता येत नसल्यामुळे तेवढ्यापुरता रस्त्याचे काम बंद केले आहे. त्यामुळे हा रस्ता पूर्ण होऊनदेखील अपूर्णच राहणार काय, असा प्रश्न निर्माण झाला आहे.
... तर दंड आकारण्यात येईल
आम्ही सदरील दुरुस्ती वेळोवेळी करून दिली आहे. परंतु, खासगी हॉटेलचालक याकडे दुर्लक्ष करीत आहेत. त्यांनी तत्काळ ही दुरुस्ती करून नाही घेतल्यास त्यांच्यावर योग्य तो दंड आकारण्यात येणार आहे.
- सचिन जैस्वाल, मुख्याधिकारी
फोटो नं. ५