कौठा : वसमत तालुक्यातील कौठा जिल्हा परिषद गटातील ग्रामपंचायतमध्ये आता सरपंचपद हे महिलांसाठी राखीव सुटल्याने या भागात जास्तीत जास्त प्रमाणात महिलाच सरपंच होणार आहेत.
या गटात आता मात्र महिलाराज येणार आहे. जानेवारी २०२१ मध्ये झालेल्या ग्रामपंचायत निवडणुकीचा निकाल जाहीर झाल्यानंतर सरपंच पदाचे आरक्षण नुकतेच जाहीर करण्यात आले. दीड वर्षानंतर दुसऱ्या टप्प्यातील होणाऱ्या निवडणुकीसाठी आरक्षण जाहीर करण्यात आले आहे. त्यानुसार कौठा गावासाठी ओबीसी महिला, किन्होळा गाव ओबीसी महिला, दगडगाव ओबीसी महिला, मोहगाव ओबीसी महिला, खुदनापुर गाव खुला प्रवर्ग महिला,धामणगाव महिला,सोमठाना खुला प्रवर्ग महिला, महमदपूर वाडी महिला इत्यादी गावात महिलाच सरपंच होणार आहेत. त्यामुळे गावचे पुढारी होण्यासाठी बाशिंग बांधून बसलेल्या पुरुष मंडळींना आता मात्र पडद्या मागूनच काम करावे लागणार आहे.
वसमत तालुक्याच्या राजकारणात नेहमीच मोलाची भूमिका बजाववणारे कौठा जिल्हा परिषद गट आहे. या गटात हिंगोली जिल्ह्यातील अनेक बडे राजकीय मंडळी कार्यरत आहेत. आता या गटात एकूण बारा ग्रामपंचायत पैकी आठ गावातील गावकारभारी या महिला होणार आहेत. सद्य:स्थितीत कौठा जिल्हा परिषद गटाच्या जिल्हा परिषद सदस्य व कौठा पंचायत समिती गणाच्या सदस्या ही महिलाच आहेत. त्यामुळे या भागात महिला राज येणार असून महिलांचे वर्चस्व राहणार आहे.