जिल्ह्यात नव्याने कोरोनाचा एक रुग्ण आढळला; सहा बरे

जिल्ह्यात कळमनुरी, वसमत परिसरात रॅपिड अँटिजेन टेस्ट कॅम्प लावण्यात आला होता. यावेळी वसमत परिसरात १७ जणांची तपासणी केली असता यामध्ये एकही रुग्ण आढळून आला नाही. मात्र कळमनुरी परिसरात ३३ जणांची तपासणी केली असता एक रुग्ण आढळून आला. दरम्यान, जिल्हा सामान्य रुग्णालयातील तीन व वसमत कोरोना सेंटर येथील तीन असे सहा रुग्ण बरे झाल्याने त्यांना रुग्णालयातून घरी सोडण्यात आले आहे. आजपर्यंत तीन हजार ७८५ रुग्ण आढळून आले असून, त्यापैकी तीन हजार ६९० रुग्ण बरे झाल्याने त्यांना घरी सोडण्यात आले आहे. आजघडीला ३९ रुग्णांवर उपचार सुरू असून, आजपर्यंत ५६ रुग्णांचा मृत्यू झाला आहे. हिंगोली जिल्हा रुग्णालयात भरती असलेल्या दोन रुग्णांची प्रकृती गंभीर असल्याने त्यांना ऑक्सिजनवर ठेवण्यात आले आहे तर एका रुग्णाची प्रकृती अतिगंभीर असल्याने त्यांना बायपॅप मशीनवर ठेवण्यात आले असल्याची माहिती आरोग्य विभागाच्या वतीने देण्यात आली आहे.