मशिदीत काम करणाऱ्या एकाचा मोबाइल हरवल्याने दोन ते तीन दिवसांपूर्वी औंढा पोलीस ठाण्यात तक्रार दिली होती. त्यानंतर तक्रारकर्त्याने त्या क्रमांकावर फोन केला तर तो वसमतला असल्याचे कळाले. समोरचा माेबाइल तर परत करीत नव्हता. उलट मुस्लीम समाजाला डिवचणारे या भ्रमणध्वनीवरून कॉल आल्याने मौलवींसह जमाव संतप्त होता. यावरून पोलीस प्रशासन तपासही करीत होते. हा क्रमांक नेमका कुणाचा आहे, कशामुळे हा प्रकार घडतोय, याची चौकशीही सुरू होती; मात्र हा क्रमांक बंद असल्याने त्यात व्यत्यय येत होता. दरम्यान, काल रमजान ईद झाल्यानंतर आज दीडशे ते दोनशे जणांचा जमाव पोलीस ठाण्यावर चालून गेला होता. त्यांनी या प्रकरणाची चौकशी का होत नाही, या कारणावरून पोलीस ठाण्यासमोरील रस्त्यावरूनच ठाण्यावर दगडफेक सुरू केली. पोलिसांचे काही एक न ऐकता ही दगडफेक सुरूच होती. हा जमाव ठाण्यात घुसण्याचा प्रयत्न करीत असल्याने बचावासाठी पोलिसांनी दोनदा गोळीबार केला. त्यानंतर जमाव पांगला. मिळेल त्या दिशेने हे लोक पळू लागले. त्यामुळे त्यांनी आणलेल्या दुचाकी जागीच सोडून दिल्या. अशा तीस ते पस्तीस दुचाकीही नंतर पोलिसांनी जप्त केल्या आहेत.
या घटनेनंतर या ठिकाणी पोलीस अधीक्षक राकेश कलासागर, सहायक पोलीस अधीक्षक यतिश देशमुख, उपविभागीय पोलीस अधिकारी वाखारे यांच्यासह जिल्ह्यातील इतर ठाण्यातून आलेले अधिकारी जमले. औंढा शहरात मोठा पोलीस बंदोबस्त लावण्यात आला आहे. सध्या औंढ्याला पोलीस छावणीचे स्वरूप प्राप्त झाले आहे.
दोन अधिकारी व आठ कर्मचारी जखमी
पोलीस निरीक्षक वैजनाथ मुंडे, सहायक पोलीस निरीक्षक मुंजाजी वाघमारे यांच्यासह इतर सात ते आठ कर्मचारी या दगडफेकीत जखमी झाले आहेत. यातील काही जणांना चांगलीच दुखापत झाली आहे. या जखमींना रुग्णालयात हलविण्यात आले आहे. या परिसरात दगडांचा खच जमा झाल्याचे पहायला मिळाले.
तीस जणांना घेतले ताब्यात
या प्रकारानंतर वरिष्ठ पोलीस अधिकारी औंढ्यात दाखल होताच या ठिकाणी पोलिसांनी कोम्बिंग ऑपरेशन सुरू केले आहे. या घटनेत दगडफेक करणाऱ्या ३० जणांना पोलिसांनी ताब्यात घेतले आहे. अजूनही धरपकड मोहीम सुरू आहे. जप्त करण्यात आलेल्या दुचाकींवरूनही आरोपींचा शोध घेण्याचा प्रयत्न केला जात आहे. याबाबत रात्री उशिरा गुन्हा दाखल होण्याची शक्यता आहे.
बचावासाठी गोळीबार
गोळीबाराबाबत पोलीस निरीक्षक वैजनाथ मुंडे यांना विचारले असता, ते म्हणाले की, मोबाइल हरवल्याच्या तक्रारीनंतर तो मोबाइल ज्याच्याकडे आहे, त्याने शिवीगाळ केल्याने ही मंडळी कारवाईची मागणी करीत होती. आरोपींना पकडण्याचे आश्वासन दिले, तरीही काहींनी चिथावणीखोर भाषणे केली. काही एक न ऐकता थेट दगडफेक केली. पोलीस जखमी झाल्याने शेवटी बचावासाठी हवेत गोळीबार केला. लवकरच गुन्हा दाखल केला जाईल.