मुख्य रस्त्यावर होतेय अतिक्रमण
हिंगोली: शहरातील काही मुख्य रस्त्यावर दुकानदार दुकानातील साहित्य ठेवत आहेत. दुकानाच्या पुढे साहित्य ठेवले जात असल्याने रस्ता अरूंद होत आहे. नगरपालिकेच्या वतीने अतिक्रमण धारकांवर कारवाई केली जात असली तरी कारवाईचे पथक आल्यानंतर रस्त्यावर ठेवलेले साहित्य पुन्हा दुकानात ठेवले जात आहे. पथक गेल्यानंतर अतिक्रमण जैसे थे होत आहे. त्यामुळे रस्त्यावर साहित्य ठेवणाऱ्या दुकानदारावर कारवाई करावी, अशी मागणी होत आहे.
जिल्हा रूग्णालय परीसरात स्वच्छतेची गरज
हिंगोली: शहरातील जिल्हा रूग्णालयात जिल्हाभरातून रूग्ण उपचारासाठी येतात. त्यामुळे हा परिसर दिवसभर गर्दीने फुलून जातो. रूग्णालयात् स्वच्छता नियमित असली तरी रूग्णालयाच्या बाहेर मात्र स्वच्छता नसल्याचे दिसून येत आहे. त्यामुळे रूग्णालयाच्या बाहेर बसणाऱ्या रूग्णांच्या नातेवाईकांना याचा त्रास होत आहे. रूग्णालय परीसरातही स्वच्छता मोहीम राबविण्याची गरज असल्याचे मत नातेवाईकांतून व्यक्त होत आहे.
नांदेड नाका रोडवर गतीरोधकाची मागणी
हिंगोली : नांदेड नाका ते उड्डाण पुलापर्यंत काही दिवसांपूर्वी डांबरीकरण करण्यात आले आहे. परंतु, रस्त्यावर गतीरोधक कुठेही टाकण्यात आले नाही. त्यामुळे काही वाहनचालक भरधावपणे वाहने चालवित आहेत. परिणामी छोटे-मोठे अपघात घडत आहेत. संबंधित विभागाने याची दखल घेऊन गतीरोधक बसवावे, अशी मागणी होत आहे.
वातावरण बदलाचा रबी पिकांना फटका
सवना : सेनगाव तालुक्यातील सवना, सवनातांडा, वायचाळ पिंपरी, ब्राह्मणवाडा, सुरजखेडा आदी गाव परिसरात १७ फेब्रुवारी रोजी हलकासा पाऊस झाला. या पावसामुळे शेतकऱ्यांची धांदल उडाली. वातावरण बदलाचा हरभरा,गहू पिकांना चांगलाच फटका बसल्याचे शेतकऱ्यांनी सांगितले.
स्वच्छता मोहीम राबविण्याची मागणी
कळमनुरी : शहरातील बसस्थानकात मागील काही दिवसांपासून कचऱ्याचे ढीग साचलेले पहायला मिळत आहेत. वारंवार आगार प्रमुखांना सागूनही अद्याप बसस्थानकात साफसफाई करण्यात आली नाही. एस. टी. महामंडळाने याची दखल घेऊन बसस्थानकात स्वच्छता मोहीम राबवावी, अशी मागणी प्रवाशांतून होत आहे.
साइडपट्ट्या भरण्याची मागणी
आखाडा बाळापूर: कळमनुरी तालुक्यातील जरोडा ते साळवा पाटीदरम्यानच्या हिंगोली ते नांदेड मार्गाच्या दोन्ही बाजूच्या साइडपट्ट्या खचल्या आहेत. त्यामुळे वाहने खाली उतरल्यास पुन्हा डांबरी रस्त्यावर घेताना वाहने उलटण्याचे प्रकार घडत आहेत. अनेक वेळा अपघाताला सामोरे जावे लागत आहे. याकडे लक्ष देऊन दोन्ही बाजूंच्या साइडपट्ट्या भरण्यात याव्यात, अशी मागणी वाहन चालकांतून होत आहे.
शौचालयाचा वापर करण्यास टाळाटाळ
हिंगोली : शहरातील शाहु नगर परिसरातील बरेच नागरिक सकाळी शौचास उघड्यावर जात आहेत. प्रत्येकाच्या घरी शौचालय असून सुद्धा नागरिक त्याचा वापर न करता उघड्यावरच जाणे पसंत करीत आहे. यामुळे याठिकाणी मॉर्निंग पथकाने लक्ष द्यावे अशी मागणी सुज्ञ नागरिकांतून होत आहे.
रस्त्याच्या दुरवस्थेकडे दुर्लक्ष
हिंगोली : शहरातील खटकाळी रस्त्यावर उड्डाणपुलाचे काम सुरू आहे. या बांधकामाच्या जवळून गेलेला रस्ता हा पूर्णपणे उखडला असून येथील गिट्टीही उघडी पडली आहे. त्यामुळे वाहनधारकांचे वाहने घसरुन अपघात होत आहे.
वीजपुरवठा वारंवार खंडीत
औंढा ना. : तालुक्यातील येहळेगाव सो. गावाचा वीजपुरवठा दिवस-रात्र खंडीत होत आहे. यामुळे अनेक नागरिकांचे वीजउपकरणे जळाल्याचे प्रकार घडले आहे. यामुळे महावितरणच्या कारभाराविषयक नागरिकांमध्ये नाराजी व्यक्त होत आहे. गावातील वीजपुरवठा सुरळीत करावा अशी मागणी ग्रामस्थांतून होत आहे.