नर्सी नामदेव : हिंगोली तालुक्यातील चांगेफळ शिवारामध्ये हरिश्चंद्र शिंदे यांच्या विहिरीमध्ये सोमवारी अनोळखी मृतदेह आढळून आल्याने परिसरामध्ये एकच खळबळ उडाली होती. अखेर मयताची ओळख पटली असून त्याचे नाव वैभव जयचंद वाठोरे ( रा. शिंदेफळ ता. सेनगाव, हल्ली मु. कमलानगर हिंगोली ) आहे. सासऱ्यानेच जावयाचा घात करून खुन केल्याचे उघडकीस आले असून याप्रकरणी नर्सी नामदेव पाेलीस ठाण्यात मयताचा सासरा व त्याच्यासोबतचे तीन ते चार साथीदारांविरूद्ध गुन्हा दाखल करण्यात आला आहे.
सविस्तर माहिती अशी की, साेमवारी हिंगोली तालुक्यातील चांगेफळ शिवारामध्ये हरिश्चंद्र शिंदे यांच्या विहिरीमध्ये एका युवकाचा मृतदेह आढळुन आला हाेता. सदरील घटनेची माहिती मिळताच हिंगाेली उपविभागीय पोलीस अधिकारी यातिश देशमुख,पोलीस निरीक्षक जगदीश भंडरवार नर्सी पोलीस ठाण्याचे सपोनि सदानंद येरेकर यांनी घटनास्थळी धाव घेऊन पाहणी केली. प्रथम युवकाची ओळख पटली नव्हती. परंतु पाेलिसांनी तपासाची चक्रे फिरवित शोध घेतला असता मयत हा वैभव जयचंद वाठोरे (२१) रा. शिंदेफळ ता. सेनगाव, हल्ली मु. कमलानगर हिंगोली येथील असल्याचे मंगळवारी निष्पन्न झाले आहे. मयत वैभव वाठाेरेचे मागील काही दिवसांपासून कौटुंबिक वाद सुरू होते, हे वाद विकोपाला गेले. अखेर मयत वैभव वाठाेरे यांचे सासरे आरोपी मधुकर नामदेव लोणकर (तलाठी) रा. जिजामाता नगर हिंगोली याने व इतर तीन ते चार साथीदारानी संगणमत करून जावई वैभवचा काटा काढण्याच्या ठरविले.
'आपणास बाभुळगाव येथे वाळुचे ट्रॅक्टर पकडायला जायचे आहे’ असे म्हणून वैभव यास सोबत घेऊन गेले. त्यानंतर आराेपी मधुकर लाेणकर व इतर तीन ते चार साथीदारांनी वैभव यास चांगेफळ शिवारातील एका विहिरी मध्ये हातपाय बांधून जीवे मारून टाकून दिले. अशा आशयाची फिर्याद मयताचे वडिल जयचंद काशिनाथ वाठोरे यांनी नर्सी पोलीस ठाण्यात दिली आहे. त्यावरून मयत युवक वैभव वाठाेरे यांचा सासरा आरोपी मधुकर लोणकर व इतर तीन ते चार साथीदाराविरुद्ध भादंवि ३०२ नुसार विविध कलमान्वये गुन्हा दाखल करण्यात आला आहे. सदर घटनेचा पुढील तपास नर्सी पोलीस ठाण्याचे सपोनि सदानंद येरेकर हे करीत आहेत.