कुजबुज

जिल्ह्यात रविवारी काँग्रेसचे प्रदेशाध्यक्ष नाना पटोले यांच्या उपस्थितीत शेकडो कार्यकर्त्यांनी माजी आमदाराच्या पुढाकाराने काँग्रेसमध्ये प्रवेश केला. कुठल्याही निवडणुका तोंडावर असल्या की सत्तारुढ असणाऱ्या पक्षात प्रवेश करणाऱ्यांची संख्या मोठी असते. यात हवसे, गवसे, नवसे सर्वच ज्या पक्षात आहेत त्या पक्षावर टीकेची झोड उठवित दुसऱ्या पक्षात प्रवेश करतात. मात्र, त्या पक्षात प्रवेश केल्यानंतर येथे देखील आपला टिकाव लागणे कठीण असल्याचे लक्षात येताच पुन्हा घरवापसी करतात. पाच वर्षांपूर्वीच अशीच कार्यकर्त्यांच्या इनकमिंगची लाट भाजपमध्ये आली होती. तेव्हा हा पक्ष राज्यात सत्तेवर देखील हाेता. पण, सत्तेवरुन पायउतार होताच या पक्षाला सुध्दा ओहोटी लागली आहे. जिल्ह्यात काँग्रेस पक्षात इनकमिंगची जोरदार लाट सुरु आहे. पक्षात प्रवेश करणाऱ्यांमध्ये काही जणांचा दोन तीन पक्षांचा प्रवास देखील पूर्ण झाला आहे. ही लाट आगामी जिल्हा परिषद निवडणुकीच्या तोंडावर आली आहे. त्यामुळे निवडणुका झाल्यानंतर ती पुन्हा ओसरु लागल्यास नवल वाटू नये. त्यामुळेच जिल्ह्यातील राजकीय वर्तुळात काँग्रेसचा भाजप होऊ नये अशी चर्चा आहे.