पवनी-धाबे : धानाचे चुकारे, धानाचे बोनस, रब्बी हंगामातील धानखरेदी व मुदतवाढ यामध्ये पक्ष शेतकऱ्यांच्या हिताचे कार्य करीत आहे. यामुळेच पक्षाची प्रत्येक दिवस ताकत वाढली आहे. अशात आता याचा उपयोग करून येणाऱ्या निवडणुकीत जिल्हा परिषदेत जास्तीतजास्त उमेदवार निवडून आणा व राष्ट्रवादीचा झेंडा फडकवा, असे प्रतिपादन माजी आमदार राजेंद्र जैन यांनी केले.
राष्ट्रवादी काँग्रेसच्या वतीने रविवारी (दि.२५) अर्जुनी-मोरगाव विधानसभा क्षेत्राचे आमदार मनोहर चंद्रिकापुरे यांच्या अध्यक्षतेत तालुक्यातील ७ जिल्हा परिषद व १४ पंचायत समिती क्षेत्रांच्या आढावा बैठकीत ते बोलत होते. याप्रसंगी जिल्हाध्यक्ष विजय शिवणकर, जिल्हा महासचिव विशाल शेंडे, युवक जिल्हाध्यक्ष किशोर तरोणे प्रामुख्याने उपस्थित होते. यावेळी क्षेत्रातील समस्या, बुथ कमिट्यांची सद्य:स्थिती व त्यांचे सक्षमीकरण, बुथनिहाय बैठका, बूथ कमिटीमध्ये जास्तीतजास्त युवक व महिलांचा सहभाग कसा वाढवता येईल, यावर सविस्तर चर्चा करून येणाऱ्या निवडणुकीकरिता योग्य उमेदवार देण्याच्या हेतूने पर्यवेक्षक निरीक्षकांची निवड करण्यात आली.