अभियंता पशीनेंवर करण्यात आलेल्या कारवाईचा निषेध

विद्युत वितरण कंपनीचे अभियंता व्ही.पी. पशिने यांच्यावर नोंदविण्यात आलेल्या विनयभंग व एट्रॉसिटीच्या गुन्ह्याचा महावितरण कर्मचारी संघटना संयुक्त कृती समितीने निषेध व्यक्त केला.

गोंदिया : विद्युत वितरण कंपनीचे अभियंता व्ही.पी. पशिने यांच्यावर नोंदविण्यात आलेल्या विनयभंग व एट्रॉसिटीच्या गुन्ह्याचा महावितरण कर्मचारी संघटना संयुक्त कृती समितीने निषेध व्यक्त केला. महावितरणच्या कर्मचाऱ्यांनी सोमवारी (दि.२३) द्वारसभा घेऊन २५ जून रोजी जिल्हाधिकारी कार्यालयावर मोर्चा काढण्याचा निर्णय घेतला आहे. २० जून रोजी रात्री १०.३० वाजता दरम्यान विद्युत वितरण कंपनीचे अभियंता व्ही.पी. पशीने, सहकारी कर्मचारी श्रीकृष्ण सांगोळे व ढेगंळे हे लाईनचे ब्रेक डाऊन करुन येत असताना कुडवा येथील चंद्रकांत सुर्यवंशी यांचे घरी डायरेक्ट हूक टाकून विजेचा वापर होत असल्याचे त्यांचे दिसले. यावर पशीने यांनी आपल्या सहकाऱ्यांना हुक काढण्यास सांगितले. त्याप्रमाणे कर्मचाऱ्यांनी कारवाई पुर्ण केली व पशीने सहकाऱ्यांसह जय अंबे हॉटेल समोर आले. दरम्यान सुदाराम राव, रुपाली उईके, चंद्रकांत सुर्यवंशीसह इतरांंनी धक्का बुक्की करून पशीने व सहकाऱ्यांना मारहाण करुन ठार मारण्याची धमकी दिली.एवढेच नव्हे तर रुपाली उके यांनी पशीनेंवर घरी येवून विनयभंग केल्याची खोटी तक्रार पोलीस स्टेशन येथे दाखल केली.व्ही.पी. पशीने यांनी चंद्रकांत सुर्यवंशी यांच्या घरचे डायरेक्ट लागलेले हुक काढल्यामुळे विनयभंग व अनुसुचित जाती जनजाती अत्याचार प्रतिबंध कायद्यान्वये गुन्हा दाखल करुन व्ही.पी. पशीने यांना अटक करण्यात पोलिसांना बाध्य केले. यावर महावितरण कर्मचारी संघटना संयुक्त कृती समितीने रामनगर कार्यालयात सोमवारी (दि.२३) द्वारसभा घेऊन पशीने यांच्यावर करण्यात आलेल्या कारवाई व अटकेचा निषेध व्यक्त केला. विशेष म्हणजे या घटनेच्या निषेधार्थ २५ जून रोजी जिल्हाधिकारी कार्यालयावर मोर्चा काढण्याचा निर्णय या द्वार सभेत घेण्यात आला. या द्वारसभेला हरीश डायरे, अभय मेश्राम, एस.एस. फुंडे, वाय.आर. सोनुले, दिगंबर कटरे, राजू बोंदरे, काका कावरे, एस.एस. पांडे, जुमडे, अरुण दशपुत्रे, ताराचंद कुंभलकर, सुनिल रेवतकर, एस.जी. जैस्वाल यांच्यासह मोठ्या संख्येने महावितरणचे कर्मचारी उपस्थित होते. (शहर प्रतिनिधी)