गोंदिया : एकेकाळी ४० गावांचा कारभार पाहणाऱ्या देवरी येथील आदिवासी सेवा सहकारी संस्था र.नं.२५६ आज आपले अस्तित्व टिकवून ठेवण्यासाठी धडपड करीत असली तरी सेवेसाठी सहकार क्षेत्रातील राजकारण करुन आलेली मंडळी मात्र स्वहितासाठी संस्थेचे लचके तोडत आहे. काही सहकार नेत्यांनी सेवा सहकारी संस्थेच्या अवसायकास हाताशी धरुन कोट्यवधीची जमीन बळकावून तिथे गाळ्यांची निर्मिती करुन आपसात वाटणी केल्याचा प्रकार समोर आला आहे. त्यामुळे सहकार क्षेत्रात हा चर्चेचा विषय झाला आहे.प्राप्त माहितीनुसार, आदिवासी सेवा सहकारी संस्था देवरी र.नं. २५६ या संस्थेवर १९९० मध्ये अवसायकाची नियुक्ती करण्यात आली होती. त्यावेळी संस्थेकडे तालुक्यातील परसोडी, बोरगाव/बाजार, चिचेवाडा, डवकी, लोहारा येथे प्रत्येकी एक तर देवरी येथे दोन गोदामासह मोक्यावर असलेली मोकळी जागा होती. आजमितीस या संस्थेच्या संपत्तीची बाजार भावाप्रमाणे कोटी रुपयांची मालमत्ता आहे. याच मालमत्तेपैकी देवरी येथील गट क्र.४४४ मध्ये ०.४९ आर जमिनीपैकी ०.०५ आर जागेत एका गोदामाचे बांधकाम करुन ०.४४ आर जागा दैनंदिन वापरासाठी मोकळी सोडण्यात आली होती. याच मोकळ्या जागेवर देवरी येथील आदिवासी विविध कार्यकारी संस्था र.नं. १३२८ च्या सहकार नेत्यांची वक्रदृष्टी पडली आणि सेवा सहकारी संस्था र.नं. २५६ चे लचके कसे तोडले जातील याची व्यूहरचना करण्यात आली. त्यासाठी एम.एस. मेळे यांना हाताशी धरुन ती जागा आपलीच असल्याचा गाजावाजा करुन तेथे एकूण १२ गाळ्याची अनधिकृतपणे निर्मिती केली. या कामी सहकार नेत्यांना अन्य राजकारणी व्यक्तींनी अप्रत्यक्ष मदत करुन त्यांचे पुनर्वसन करण्याचे अभिवचन पूर्ण केल्याचे राजकीय वर्तुळात बोलले जात आहे. वास्तविक पाहता अवसायक मेळे यांनी संस्थेवर जिल्हा बँकेचे असलेले १,५६,११४.७९ रुपये थकबाकी या गाळे विक्रीच्या व्यवहारातून करणे अपेक्षित होते. परंतु त्यांनी स्वत:च सचिव असलेल्या आदिवासी विविध कार्यकारी संस्था देवरी र.नं. १३२८ च्या संचालक मंडळाच्या म्हणण्यावरुन अवसायनात असलेल्या संस्थेची जमीन हडप करण्याचा कुटील डाव आखला आणि हा डाव यशस्वीही झाल्याचे बोलले जाते. याची तक्रार सहायक निबंधक मोरगाव अर्जुनी यांच्याकडे २३ मार्च २०१५ रोजी केली असली तरी राजकीय दबावापोटी अधिकारी कारवाई करण्यास धजावत नसल्याचे बोलले जात आहे. (जिल्हा प्रतिनिधी)
सेवा सहकारी संस्थेत भूखंड घोटाळा?
By admin | Updated: May 1, 2015 00:14 IST