बारदाणाअभावी धान खरेदी प्रभावित

वर्षभर शेतात मेहनत करुन सुद्धा धानाची समर्थन मूल्यावर विक्री करण्याकरिता शेतकऱ्यांना जीवाचा आटापीटा करावा लागत असल्याचे चित्र तालुक्यातील सर्वच धान खरेदी केंद्रावर दिसून येत आहे.

देवरी : वर्षभर शेतात मेहनत करुन सुद्धा धानाची समर्थन मूल्यावर विक्री करण्याकरिता शेतकऱ्यांना जीवाचा आटापीटा करावा लागत असल्याचे चित्र तालुक्यातील सर्वच धान खरेदी केंद्रावर दिसून येत आहे. आदिवासी विकास महामंडळ द्वारा संचालित तालुक्यातील सर्व आधारभूत धान खरेदी केंद्रावर शासनाच्या दिरंगाईमुळे बारदाने पूर्णपणे मिळाले नसल्याने खरेदी केंद्रावर धान खरेदी पूर्णपणे बंद आहे. प्राप्त माहितीनुसार, येथील आदिवासी विविध कार्य. संस्थेत आतापर्यंत फक्त तीन हजार ५०० क्विंटल धानाची खरेदी करण्यात आली आहे. या खरेदी केंद्राद्वारे सोळा हजार बारदाण्याची मागणी आदिवासी महामंडळ विभागाला केली असता त्यांनी केवळ आठ हजार बारदाने पुरवील्याचे सांगण्यात आले. सध्या बारदाने नसल्यामुळे खरेदी बंद करण्यात आली आहे. मागील १५ दिवसांपासून बारदाने नसल्याने शेतकऱ्यांचा हजारो क्विंटल धान उघड्यावर ठेवला असून केंद्रात कॅप कव्हरची व्यवस्था नसल्याने शेतकऱ्यांना आपल्या घरुन चादरी व महिलांच्या साड्या आणून धानाच्या बोऱ्यांवर झाकावे लागत आहे. दुसरीकडे धान उघड्यावर असल्याने धानाची चोरी होण्याची भिती असल्याने ऐन कडकडत्या थंडित रात्रंदिवस जागून धानाची सुरक्षा करावी लागत असल्याने क्षेत्रातला शेतकरी पूर्णपणे हवालदिल झाला आहे. सर्व शेतकऱ्यांनी इलेक्ट्रॉनिक वजनाची मागणी करून सुद्धा अजूनपर्यंत इलेक्ट्रानिक वजन प्राप्त न झाल्याने कित्येक केंद्रावर शेतकऱ्यांची लूट होताना दिसून येत आहे. या सर्व समस्येबाबत क्षेत्राचे आमदार संजय पुराम यांनी प्रादेशिक व्यवस्थापक व महाव्यवस्थापक आदिवासी विकास महामंडळ नाशिक यांच्याशी चर्चा करुन त्वरित बारदाने उपलब्ध करुन देण्याचे निर्देश दिले आहेत. (प्रतिनिधी)