गोंदिया : शहर पोलीस ठाण्याच्या हद्दीत मोबाइल चोरी करणारी टोळी सक्रिय झाली आहे. मागील दोन दिवसांत चौघांचे सात मोबाइल चोरीला गेल्याची तक्रार गोंदिया शहर पोलिसांनी नोंदविली आहे. पळविण्यात आलेले हे सात मोबाइल १ लाख १४ हजार ९९० रुपये किमतीचे आहेत. यासंदर्भात गोंदिया शहर पोलिसांनी अज्ञात आरोपींवर गुन्हा दाखल केला आहे.
शहराच्या मामा चौकातील मोसीम वल्द शफी शेख (३२) यांच्या घरातून २९ जानेवारीच्या सकाळी ८ वाजता १७ हजार रुपयांचे दोन मोबाइल पळविण्यात आले. विवेकानंद कॉलनी, सिव्हिल लाइन, गोंदिया येथील चैतन्य प्रकाश राहांगडाले (२९) यांच्या घरातील हॉलमध्ये टेबलवर ठेवलेले ५३ हजार रुपये किमतीचे दोन मोबाइल अज्ञात आरोपींनी २८ जानेवारीच्या सकाळी ९.३० दरम्यान पळवून नेले. तक्रारीवरून गोंदिया शहर पोलिसांनी भादंविच्या कलम ३८० अन्वये गुन्हा दाखल केला आहे. तिसरी चोरीची घटना कुंभारेनगर, गोंदिया येथील आहे. कुंभारेनगरातील नितेश केशोराव डोंगरे (३९) यांच्या घरी हॉलमध्ये ठेवलेले २५ हजार रुपये किमतीचे दोन मोबाइल २९ जानेवारीच्या सकाळी ८ वाजता चोरी करण्यात आले. चौथी चोरी माताटोली शक्कर धर्मशाळा, गोंदिया येथील गुलशन परमानंद नागदेव (३८) यांच्या घरातून टेबलावर ठेवलेला १९ हजार ९९० रुपये किमतीचा मोबाइल अज्ञात चोरट्यांनी पळविला. ही घटना २९ जानेवारीच्या सकाळी ८ च्या दरम्यान घडली. गोंदिया शहर पोलिसांनी या घटनेसंदर्भात भादंविच्या कलम ३८० अन्वये गुन्हा दाखल केला आहे. या गुन्ह्याचा तपास पोलीस नायक योगेश बिसेन करीत आहेत.