उघड्यावर पडलेल्या खड्ड्यांकडे दुर्लक्षच

शहरात ठिकठिकाणी खड्डे उघड्यावर पडलेले आहेत. या गंभीर प्रकारावर लोकमतने बातमीच्या माध्यमातून प्रकाश टाकला. मात्र एवढ्यावरही नगर पालिकेच्या अधिकारी व पदाधिकाऱ्यांवर काहीच प्रभाव पडला नाही.

गोंदिया : शहरात ठिकठिकाणी खड्डे उघड्यावर पडलेले आहेत. या गंभीर प्रकारावर लोकमतने बातमीच्या माध्यमातून प्रकाश टाकला. मात्र एवढ्यावरही नगर पालिकेच्या अधिकारी व पदाधिकाऱ्यांवर काहीच प्रभाव पडला नाही. कारण दोन दिवस लोटूनही शहरातील खड्डे जसेच्या तसे दिसून आले. मागील दोन दिवसांपासून शहरात जोरदार पाऊस पडत आहे. अशात या खड्यांत पाणी भरून एखादा अपघात घडल्यास त्याला ती व्यक्तीच जबाबदार राहणार असा नियम नगर पालिकेने लागू केल्याचे बोलणे वावगे ठरणार नाही. शहरातील बाजार परिसर, चांदनी चौक, शारदा वाचनालय परिसर, सिंधी कॉलनी, कुडवा लाईनसह अन्य भागांत रस्त्यावरील खड्डे उघड्यावर पडलेले आहेत. अंडरग्राऊंड नाल्यांची सफाई करण्याच्या दृष्टीने सोडण्यात आलेले हे आऊटलेट असून त्यावर झाकण न बसविल्याने हे खड्डे उघडेच आहेत. यातील कित्येक खड्डे मागील कित्येक वर्षांपासून उघडेच असून या खड्यांमुळे आजवर अपघातही घडल्याचे परिसरातील नागरिकांनी सांगीतले. हीच समस्या आजही उद्भवत असल्याचेही चित्र बघावयास मिळत आहे. नेमकी हीच बाब लोकमतने १३ जून रोजी शहरवासी व नगर पालिकेच्या नजरेत आणून दिली. विशेष म्हणजे या समस्येवर पालिकेच्या पदाधिकाऱ्यांनी त्वरीत कारवाईचे आश्वासन सुद्धा दिले होते. मात्र दोन दिवस लोटूनसुद्धा शहरातील हे खड्डे आहेत तसेच आहेत. यावरून नगर पालिकेचे अधिकारी व पदाधिकारी किती कर्तव्य तत्पर व शहरवासीयांप्रती किती सजग आहेत याची प्रचिती येते. मागील दोन दिवसांपासून पावसाने जोरदार हजेरी लावून सर्वांना भांबाऊन सोडले. तर पहिल्याच पावसाने नगर परिषदेच्या स्वच्छता अभियानाची पोलखोल करून टाकली. अशात मात्र या खड्यांत पाणी भरून अपघात घडण्याची शक्यता टाळता येणार नाही. (शहर प्रतिनिधी)