गोंदिया : स्थानिक गुन्हे शाखेचे पोलीस पथक आमगाव येथे गस्त घालत असताना कुंभारटोली परिसरात दोन युवक संशयास्पद हालचाल करता दिसून आले. दरम्यान त्यांची विचारपूस केली असता त्यांच्यावर संशय बळवला. त्यामुळे त्यांच्या जवळच्या पिशवीची तपासणी केल्याने दागिने हाती लागले. यावरून दागिने चोरीचे असल्याचे समोर आले. त्याचबरोबर त्या युवकांनी टोळीत आणखी चार युवकांचा समावेश असल्याचे सांगितले. यावरून घरफोडी करणाऱ्या टोळीला गजाआड करण्यात आले. आरोपींकडून ७८ हजार ६०० रुपये किमतीचे दागिने जप्त करण्यात आले. ही कारवाई रविवारी करण्यात आली.
आरोपींमध्ये ठुन्या उर्फ कुणाल राजेश साखरे (२२), रिंकू प्रकाश गेडाम (१९), मयूर शंकर गडकरी (२१), सहयोग पुरुषोत्तम घोडेस्वार (१९) सर्व रा.कुंभारटोली, शुभम राजकुमार मेश्राम (१९) रा.डोंगरगढ (छत्तीसगढ) व एका १७ वर्षीय युवकाचा समावेश आहे.
स्थानिक गुन्हे शाखेचे पोलीस उपनिरीक्षक अभय शिंदे व लिलेंद्र बैस, राजेश बडे, तुलसीदास लुटे, विठ्ठल ठाकरे, रंजीत बिसेन, चेतन पटले, सुजाता गेडाम यांचे पथक आमगाव क्षेत्रात गस्त घालत होते. दरम्यान कुंभारटोली परिसरात कुणाल साखरे व मयूर गडकरी हे दोन युवक संशयास्पद हालचाली करताना दिसून आले. पोलीस पथकाने दोन्ही युवकांना ताब्यात घेऊन कसून चौकशी केली असता त्यांच्याकडे सोन्याचे दागिने सापडले. दरम्यान त्यांची विचारपूस केली असता कुंभारटोली येथील अशोक नंदेश्वर यांच्या घरचे दार तोडून १० व ११ मेच्या रात्री दागिने लंपास केल्याची कबुली दिली. त्याचबरोबर या टोळीत मयूर गडकरी, शुभम मेश्राम, सहयोग घोडेस्वार हे देखील सहभागी असल्याचे सांगितले. यावरून सर्व आरोपींना अटक करून त्यांच्याकडून एकूण ८९ हजार ६०० रुपयांचा मुद्देमाल जप्त करण्यात आला.