ग्रामीण भागातील महिलांना मोफत शिवणकला प्रशिक्षण

अदानी फाऊंडेशन तिरोडाद्वारे संचालित जनशिक्षण संस्था गोंदिया यांच्या तांत्रिक मार्गदर्शनाखाली सक्षम शिवणकला प्रशिक्षण केंद्र मेंदिपूर...

४० प्रशिक्षणार्थींचा सहभाग : अदानी फाऊंडेशन तिरोडाचा उपक्रमगोंदिया : अदानी फाऊंडेशन तिरोडाद्वारे संचालित जनशिक्षण संस्था गोंदिया यांच्या तांत्रिक मार्गदर्शनाखाली सक्षम शिवणकला प्रशिक्षण केंद्र मेंदिपूर व शांती शिवणकला प्रशिक्षण केंद्र टिकारामटोला येथील उत्तीर्ण प्रशिक्षणार्थी महिलांना प्रमाणपत्र वाटप करण्यात आले. तसेच समारोपीय कार्यक्रम टिकारामटोला काचेवानी येथील समाजमंदिरात घेण्यात आला. सदर दोन्ही प्रशिक्षण केंद्रात एकूण ४० प्रशिक्षणार्थ्यांनी यशस्वीरीत्या प्रशिक्षण पूर्ण केले. याप्रसंगी प्रामुख्याने अदानी पॉवर महाराष्ट्र लिमिटेडचे स्टेशन हेड सी.पी. शाहू, हेड आॅपरेटर समीर मित्रा, नितीन पाठक, मेंदिपूरच्या सरपंच मुक्ता रहांगडाले आदी मान्यवर उपस्थित होते.आपल्या मार्गदर्शनात सी.पी. शाहू म्हणाले, महिला-पुरूष हे संसरारूपी गाडीचे दोन चाक असून स्त्री ही पुरूषापेक्षा कुठेही कमी नाही. अशा प्रशिक्षणाच्या माध्यमातून ती आपले कौशल्य विकास करून आपल्या कुटुंबाच्या उदरनिर्वाहास हातभार लावू शकते. अदानी फाऊंडेशन महिलांना रोजगार निर्मितीकरिता प्रेरित करून सक्षम बनविण्याचा उदात्त हेतू ठेवूनच विकासात्मक कार्य करीत राहणार आहे, असे सांगून स्टेट बँक अपघात विमा व नशामुक्ती या विषयी माहिती सांगितली.समीर मित्रा म्हणाले, या प्रशिक्षणामध्ये ज्या महिला व मुलींनी प्रशिक्षण घेऊन प्रमाणपत्र मिळविले, त्यांनी येथेच न थांबता पुढे भरारी घ्यावी व आधुनिक व्यवसायात्मक दृष्टिकोन ठेवावा, असे सांगितले. नितीन पाठक मार्गदर्शन करताना म्हणाले, यात ज्या महिला व मुलींनी प्रशिक्षण घेतले, त्यांनी आपला व्यवसाय थाटून आपल्या कुटुंबाचा गाडा चालविण्यासाठी मदत करावी, असे सांगितले. कार्यक्रमात उपस्थित मेंदिपूर येथील सरपंच मुक्ता रहांगडाले यांनी, अदानी फाऊंडेशनने या सहामाही शिवणकला प्रशिक्षणामध्ये एक नाविण्यपूर्ण व स्वयंपूर्ण असे प्रशिक्षण दिले. ते सर्वसुविधायुक्त असल्याचे सांगून सर्वच प्रशिक्षणार्थ्यांची कापड शिवणकामाबद्दलची फिनिशिंग उत्तम असल्याचे निरीक्षण करून सांगितले. तसेच त्यांनी अदानी फाऊंडेशनचे आभार मानले. आपल्या प्रास्ताविकात जनशिक्षण संस्थेचे संचालक सम्राट पाल यांनी, शिवणकला प्रशिक्षण उत्तीर्ण प्रशिक्षणार्थ्यांना मिळणाऱ्या प्रमाणपत्राचा लाभ विविध शासकीय योजनांसाठी होतो, असे सांगितले. अदानी फाऊंडेशनने प्रशिक्षण दिल्याबद्दल त्यात सहभागी ४० प्रशिक्षणार्थ्यांनी फाऊंडेशनचे आभार व्यक्त केले.(प्रतिनिधी)