साखरीटोला : बँक ऑफ महाराष्ट्र शाखा सातगावचे व्यवस्थापक लग्नाच्या सुटीवर गेल्याने शेतकरी अडचणीत सापडले असून पीक कर्ज कोण देईल असा प्रश्न शेतकऱ्यांना पडला आहे.
सध्या शेतकऱ्यांचा खरीप हंगाम सुरु आहे. त्यामुळे शेतकरी पीक कर्जाची उचल करतात, परंतु बँकेच्या टाळाटाळीमुळे शेतकऱ्यांना पीक कर्ज काढण्यासाठी मोठा त्रास सहन करावा लागतो. अनेक कागदपत्रांची जुळवाजुळव करुन बऱ्याच शेतकऱ्यांनी बँक ऑफ महाराष्ट्र शाखा सातगाव येथे सादर केले आहेत. आज होईल, उद्या होईल असे सांगत व्यवस्थापकाने बरेच अर्ज वेटिंग ठेवले आहे. ऐन पीक कर्ज देण्याच्या वेळी व्यवस्थापक रजेवर गेले त्यामुळे बरेच शेतकरी त्रस्त झाले आहेत. कागदपत्रांची पूर्तता करुन ही पीक कर्ज दिले नाही आणि ऐन वेळेवर सुटीवर गेल्याने आता कर्ज कोण देणार असा प्रश्न पडला आहे. याबाबत बँकेत चौकशी केली असता २६ जुलैपर्यंत व्यवस्थापक श्रीवास्तव रजेवर असल्याची माहिती आहे. त्यांच्या अनुपस्थितीत आम्हाला कर्ज देता येत नाही, असे बँकेतील इतर कर्मचाऱ्यांचे म्हणणे आहे. मागील वर्षी सुद्धा हीच गत होती. जुलै महिन्यात कर्ज मिळणे कठीण आहे. शासनाने शेतकऱ्यांना पीक कर्ज वेळेवर देण्याची सूचना केली असताना सुद्धा व्यवस्थापकामुळे परिसरातील शेतकरी अडचणीत सापडले असून वरिष्ठ अधिकाऱ्यांनी मॅनेजरची व्यवस्था करावी व शेतकऱ्यांना दिलासा घ्यावी, अशी मागणी शेतकऱ्यांनी केली आहे.