गोंदिया : जिल्ह्याची आता कोरोनामुक्तीच्या दिशेने वाटचाल सुरू असून आठपैकी सहा तालुके आता पूर्णपणे कोरोनामुक्त झाले आहेत. तर उर्वरित दोन तालुक्यांत केवळ ७ कोरोना ॲक्टिव्ह रुग्ण आहेत. त्यामुळे ही जिल्हावासीयांसाठी निश्चितच दिलासादायक बाब आहे.
कोरोना संसर्गाच्या अनुषंगाने मंगळवारी (दि.२७) ६७८ नमुन्यांची चाचणी करण्यात आली. यापैकी ५६२ नमुन्यांची आरटीपीसीआर, तर १२५ नमुन्यांची रॅपिड अँटिजन टेस्ट करण्यात आली. यापैकी १ नमुना कोरोना पॉझिटिव्ह आढळला. त्याचा पॉझिटिव्हिटी रेट ०.१५ टक्के आहे. जिल्ह्यातील तिरोडा, गोरेगाव, आमगाव, सालेकसा, देवरी, सडक अर्जुनी या सहा तालुक्यांमध्ये सध्या एकही कोरोनाबाधित रुग्ण नसून हे तालुके पूर्णपणे कोरोनामुक्त झाले आहे. तर उर्वरित दोन तालुक्यांत केवळ ७ कोरोना ॲक्टिव्ह रुग्ण आहेत. त्यामुळे येत्या तीन-चार दिवसांत जिल्हा पूर्णपणे कोरोनामुक्त होण्याची शक्यता नाकारता येत नाही. कोरोना संसर्गाच्या अनुषंगाने जिल्ह्यात आतापर्यंत २१५०९९ नमुने तपासणी करण्यात आले. यापैकी १८९९८९ नमुने निगेटिव्ह आले. कोरोनाबाधितांचा त्वरित शोध घेण्यासाठी रॅपिड अँटिजन टेस्ट केली जात आहे. यांतर्गत २२१८८४ नमुने तपासणी करण्यात आले. त्यापैकी २००७९३ नमुने कोरोना निगेटिव्ह आले. जिल्ह्यात आतापर्यंत ४११८३ कोरोनाबाधित आढळले असून यापैकी ४०४७५ बाधितांनी कोरोनावर मात केली आहे. सद्य:स्थितीत ७ कोरोना ॲक़्टिव्ह रुग्ण असून १२ स्वॅब नमुन्यांचा अहवाल गोंदिया येथील प्रयोगशाळेकडून प्राप्त व्हायचा आहे.
..........
लसीकरणाची सहा लाखांच्या दिशेने वाटचाल
जिल्ह्यात कोरोना प्रतिबंधात्मक लसीकरणाला आता वेग आला आहे. १४० हून अधिक केंद्रांवरून सध्या लसीकरण मोहीम सुरू असून याला नागरिकांचा चांगला प्रतिसाद मिळत आहे. जिल्ह्यात आतापर्यंत ५६६८९१ नागरिकांचे लसीकरण करण्यात आले आहे. लसीकरणाची टक्केवारी ४४ वर आहे.