गोंदिया : कोरोना संसर्गजन्य आजार असून, बाधितांच्या संपर्कात आल्यानेही त्याची बाधा होते. परिणामी नागरिकांत चांगलीच धास्ती असून अशात प्रवास करताना कोरोनाची बाधा होण्याची शक्यता नाकारता येत नाही. यामुळे कित्येकांनी आता आपल्या कामकाजासाठी प्रवासी वाहनांत जाण्यापेक्षा आपलीच दुचाकी किंवा चारचाकी खरेदी केली आहे. कुणाच्याही वाहनातून प्रवास करून धोका पत्करण्यापेक्षा आपलेच वाहन बरे, अशी नागरिकांची मनस्थिती बनली आहे. यातूनच जिल्ह्यात प्रवासी वाहनांपेक्षा दुचाकी व चारचाकी वाहनांची विक्री वाढल्याचे दिसून येत आहे.
------------------------------------
दुचाकी-चारचाकी विक्री वाढली
दुचाकी चारचाकी
२०१९ १५९२१ १११३
२०२० १६४८१ १२४१
२०२१ (मार्चपर्यंत) १२१३८ १५०७
२) ऑटो-टॅक्सी कारची विक्री घटली
ऑटो टॅक्सीकार
२०१९ २८९ ११
२०२० १५७ २०
२०२१ (मार्चपर्यंत) १० ०९
---------------------------------------
३) ऑटोचालक - टॅक्सीचालक परेशान
कोरोना हा संसर्गजन्य आजार आहे. यामुळे आम्हालाही प्रवासी बसविताना भीती वाटते. मात्र, आमची रोजीरोटी असल्याने आम्ही संपूर्ण खबरदारी घेऊन गाडी चालवितो. मात्र, कोरोनाच्या भीतीने प्रवाशांची संख्या आता कमी झाली आहे. बहुतांश नागरिक स्वत:च्या वाहनानेच प्रवासाला प्राधान्य देत आहेत. यामुळे आमच्या रोजगारावर गदा आली आहे.
- सतीश समुद्रे (ऑटो चालक)
-----------------------------
प्रवासी व आमच्या सुरक्षेसाठी आम्ही ऑटो वारंवार सॅनिटाईज करीत असतो. मात्र, कोरोनाच्या भीतीमुळे नागरिकांनी आता एकतर प्रवास टाळले आहेत. त्यातही जर अत्यंत महत्त्वाचे काम असेल तरच ते प्रवास करतात. यातही आपल्या दुचाकी किंवा चारचाकीनेच प्रवासाला त्यांची प्राथमिकता आहे. यामुळे पूर्वीसारखा आमचा धंदा राहिलेला नाही.
- तेजराम हलमारे (ऑटो चालक)
-------------------------------
...म्हणून घेतली चारचाकी
कोरोना हा संसर्गजन्य आजार असून, प्रवासादरम्यान संपर्कात आलेल्या नागरिकांमुळेही त्याची लागण होऊ शकते. अशात प्रवास टाळणे गरजेचे आहे. मात्र, आमच्या कामामुळे प्रवास करावाच लागतो. त्यामुळे स्वत:ची गाडी असली तर कामेही होतात शिवाय कुटुंबीयांचीही सोय होते. म्हणूनच स्वत:ची चारचाकी घेतली.
- मिलिंद वैद्य
----------------------------
बस किंवा ऑटोसारख्या प्रवासी वाहनांतून प्रवास केल्याने अन्य नागरिकांच्या संपर्कात येऊन कोरोना संसर्गाची भीती असते. अशात प्रवासी वाहनांपेक्षा आपल्या स्वत:च्या वाहनानेच प्रवास केलेला बरा. याकरिता स्वत:चे चारचाकी वाहन खरेदी केले आहे.
- रोहित गणवीर