‘मायनस मार्किंग’ पद्धत बंद करा

औद्योगिक प्रशिक्षण संस्थेच्या (आयटीआय) परीक्षांत आता मायनस मार्किंगची पद्धत सुरू करण्यात आली आहे.

गोंदिया : औद्योगिक प्रशिक्षण संस्थेच्या (आयटीआय) परीक्षांत आता मायनस मार्किंगची पद्धत सुरू करण्यात आली आहे. याबाबत पूर्व माहिती न देता विद्यार्थ्यांची मायनस मार्कींग करण्यात आल्याने फक्त सहा टक्के निकाल लागला आहे. अशात मायनस मार्किंगची ही पद्धत त्वरीत बंद करण्याची मागणी औद्योगीक प्रशिक्षण संस्थेतील विद्यार्थ्यांनी केली आहे. यासाठी विद्यार्थ्यांनी निवासी उप जिल्हाधिकारी अनंत वालस्कर यांना ४ डिसेंबर रोजी निवेदन दिले. यापूर्वी औद्योगिक प्रशिक्षण संस्थेकडून घेण्यात येणाऱ्या परिक्षांत मायनस मार्किंगची पद्धत नव्हती. तर प्रथम सत्र परीक्षेपर्यंत ही पद्धत अंमलात नव्हती. आॅगस्ट २०१४ च्या सिलॅबसनुसार ज्या विद्यार्थ्यांनी परीक्षा दिली त्याच्या प्रश्नपत्रिकेवरही याबाबत नोंद नव्हती. मात्र मायनस मार्किंग करण्यात आली व परिणामी येथील प्रशिक्षण संस्थेचा निकास फक्त सहा टक्के लागला. एकीकडे शासन औद्योगिक प्रशिक्षणाला महत्व देत तरूणांना याकडे वळण्याचे आवाहन करीत आहे. तर दुसरीकडे मायनस मार्किंगचा प्रकार सुरू केला जात आहे.विशेष म्हणजे आठवी पास विद्यार्थ्यांना कोणत्याच प्रकारचे प्रशिक्षण घेता येत नसताना शासनाने त्यांना वेल्डर, वायरमन व कारपेंटरचे प्रशिक्षण उपलब्ध करविले. आता त्या आठवी पास विद्यार्थ्यांना मायनस मार्किंग केल्यास त्यांचे प्रशिक्षण पूर्ण कसे होणार असा सवाल येथील विद्यार्थी करीत आहेत. इंजिनियरींग व पॉलिटेक्निक अभ्यासक्रमात मायनस मार्किंग होत नाही. तसेच आयटीआयचा विद्यार्थी अधिकाऱ्यांच्या पदापर्यंत पोहचू शकत नाही. असे असताना मात्र त्यांनाच मायनस मार्किंग सुरू करण्यामागचे शासनाचे धोरण काय ते निश्चित होत नाही. करिता आयटीआयमध्ये सुरू करण्यात आलेली मायनस मार्किंगची ही पद्धत त्वरित बंद करण्याची मागणी विद्यार्थ्यांनी केली आहे. यासाठी सुमारे २०० विद्यार्थ्यांनी निवासी उपजिल्हाधिकारी वालस्कर यांना निवेदन दिले. तसेच ही पद्धत त्वरीत बंद न झाल्यास तीव्र आंदोलनाचा इशारा दिला आहे. (शहर प्रतिनिधी)