आमगाव : आमगाव ग्रामपंचायत अंतर्गत झुडूपी जंगल महसूलच्या जमिनीवर जिल्हा परिषदेने व्यापार संकुल बांधकामाचे प्रस्ताव मंज़ूर करुन अनधिकृतपणे बांधकाम सुरू केले होते. या दोषपूर्ण प्रक्रियेला नागरिकांनी विरोध दर्शवून न्यायालयात धाव घेतली. परंतु बांधकाम बंद करण्यास बांधकाम विभाग तयार नव्हते. या मुजोरशाहीविरुद्ध नागरिकांनी ९ मे पासून आमरण उपोषण करण्याचा इशारा दिला. त्याची दखल घेत जिल्हाधिकाऱ्यांनी हे बांधकाम बंद करण्याचे निर्देश दिले. आमगाव ग्रामपंचायत हद्दीत असलेले महसूल झुडपी जंगल या भुखंडावर जिल्हा परिषदेने आर्थिक व्यवहार घडवून या ठिकाणी व्यापार संकुल बांधकामाचा प्रस्ताव अनधिकृतपणे मंजूर करुन घेतला. परंतु गट क्र. २३५, २३६ या भुखंडावरील मालकी महसूल झुडपी जंगलाप्रमाणे शासकीय रेकॉर्ड आहे. जिल्हा परिषदेने या भूखंडावर व्यापारी संकुल बांधण्यासाठी मालकी हक्क असणाऱ्या विभागाची कोणतीच परवानगी घेतली नाही. जमिनीचे हस्तांतरण करण्यात आले नाही. त्यामुळे या वादग्रस्त प्रस्तावाला नागरिकांनी आधीपासून विरोध दर्शविला. परंतु जिल्हा परिषद बांधकाम विभागाने हे बांधकाम तातडीने पूर्ण करण्यासाठी हालचाली सुरू केल्या होत्या. या वादग्रस्त व्यापार संकुल बांधकामाला नागरिकांनी न्यायालयात दाद दिली. सदर बांधकाम बंद करुन अनधिकृत बांधकाम करणाऱ्यांविरुद्ध फौजदारी कारवाई व्हावी यासाठी नागरिकांनी पाठपुरावा केला. सदर बांधकाम बंद करण्यासाठी नागरिकांच्या मागणीकडे जि.प. बांधकाम विभाग बक्ष देत नसल्यामुळे नागरिकांनी जिल्हाधिकारी यांची भेट घेवून निवेदन दिले. तसेच ९ मे पासून उपोषण करणार असल्याचे पत्रही दिले होते. जिल्हाधिकाऱ्यांनी निर्देश देताच बांधकाम विभाग व तहसीलदार यांनी बांधकाम बंद करण्यास सांगितले. (शहर प्रतिनिधी)
अखेर ‘त्या’ व्यापार संकुलाचे बांधकाम बंद
By admin | Updated: May 11, 2016 01:40 IST