उड्डाण पुलावर अपघात

भरधाव वेगात असलेल्या दुचाकीचे समोरचे चाक निघाल्याने घडलेल्या अपघातात एक तरूण जागीच ठार झाला असून अन्य

गोंदिया : भरधाव वेगात असलेल्या दुचाकीचे समोरचे चाक निघाल्याने घडलेल्या अपघातात एक तरूण जागीच ठार झाला असून अन्य दोघे जखमी झाले आहेत. येथील नव्या फ्लायओवरवर रविवारी (दि.२०) सायंकाळी ४ वाजतादरम्यान ही घटना घडली. मृताचे नाव मनोहर भोंगाडे (रा.सरांडी,तिरोडा) असे आहे. तर संदीप कृ ष्णमुरारी चुऱ्हे (२०) व आशिष टिंगोले (रा.मुर्री चौकी) असे जखमींचे नाव आहे.मिळालेल्या माहितीनुसार, मृत मनोहर भोंगाडे, जखमी संदीप चुऱ्हे व आशीष टिंगोले हे गर्ल्स कॉलेज मार्गावरील अशोका एजंसीजमध्ये कार्यरत आहेत. तिघांनी एका मयतीतून आल्यावर आशिष टिंगोलेच्या घरी जेवण केले व एक्सेस दुचाकी क्रमांक एमएच३५/टी ९६५२ ने ट्रिपलसीट मरारटोलीकडून आंबेडकर चौकाकडे येत होते. यात भरधाव वेगात असलेल्या दुचाकीचे समोरचे चाक निघाल्याने त्यांचा अपघात घडला व तिघे पडले. या अपघातात मनोहर भोंगाडे याचा जागीच मृत्यू झाला. तर संदीप चुऱ्हे व आशिष टिंगोले जखमी झाले. संदीपच्या घुडग्याला जबर मार लागला असून त्याची प्रकृती धोक्याबाहेर आहे. मात्र आशिषच्या चेहऱ्यावर जबर मार लागला असून त्याची प्रकृती गंभीर असल्याने त्याला नागपूरला पाठविण्यात येणार आहे. गाडीच्या समोरच्या चाकाचा चिमटा तुटल्याने हा अपघात घडल्याचे पोलिसांचेही म्हणणे आहे. (शहर प्रतिनिधी)