गोंदिया : पतीकडे असलेल्या मोठ्या मुलाची प्रकृती बघण्यासाठी सासरी गेलेल्या महिलेला नवरा, सासू, सासरा व सासऱ्याने रॉडने मारून जखमी केले. सालेकसा पोलिस ठाण्यांतर्गत ग्राम कावराबांध येथे शुक्रवारी (दि.१८) सायंकाळी ६ वाजता दरम्यान ही घटना घडली.सीमा सेवकदास लिल्हारे (२७, रा. कावराबांध) यांचे पती सेवकदास गोपालदास लिल्हारे (३२,रा.कावराबांध) यांच्यासोबत पटत नसल्याने सीमा सध्या ग्राम खोलगड येथील आपल्या माहेरी लहान मुलाला घेऊन राहते. तर मोठा मुलगा आयुष सेवकदास यांच्याजवळ राहत आहे.
आयुषची प्रकृती बरी नसल्याची माहिती मिळाल्याने त्याला बघण्यासाठी शुक्रवारी सायंकाळी सीमा लिल्हारे आपली मैत्रीण सीमा नागपुरे हिला सोबत घेऊन सासरी गेली होती. यावेळी घराच्या समोर रस्त्यावर उभे राहून तिने आपल्या मुलाला आवाज दिला. यावर आरोपी सेवकदास लिल्हारे, गोपालदास लिल्हारे (५८), संपत्तीबाई गोपालदास लिल्हारे (५३) व ओमप्रकाश गोपालदास लिल्हारे (३४, सर्व रा. कावराबांध) यांनी तिला रॉडने मारून गंभीर जखमी केले. या घटने संदर्भात सालेकसा पोलिसांनी चारही आरोपीविरुद्ध भादंवि कलम ३२६, ३४ अन्वये गुन्हा दाखल केला आहे. तपास पोलिस हवालदार मानकर करीत आहेत.