म्हापसा : उपनिरीक्षक असलेल्या पतीचे सर्व्हिस रिव्हॉलवर पाहण्याची उत्सुकता पत्नीच्या अंगलट येण्याचा प्रकार म्हापसा पोलीस स्थानकाच्या हद्दीत घडला आहे. भारतीय पोलीस राखीव दलात (आयआरबी) असलेल्या या उपनिरीक्षकाची पत्नी गौरी धनू बोगाटी (२४) ही सर्व्हिस रिव्हॉलवर पाहत असताना त्यातून अचानक सुटलेल्या गोळीमुळे ती गंभीर जखमी झाल्याची घटना गिरी परिसरात मंगळवारी रात्री घडली.
सर्व्हिस रिव्हॉलवर पाहत असताना अचानक गोळी सुटून ती गौरी हिच्या डाव्या हाताच्या मनगटातून आरपार जाऊन डाव्या मांडीत घुसली. घडलेल्या या प्रकारात तिचे मनगट व मांडीचे हाड मोडले आहे. तातडीने तिला उपचारासाठी आरंभी उत्तर गोवा जिल्हा रुग्णालयात दाखल करण्यात आले. नंतर तेथून गोवा वैद्यकिय महाविद्यालयात दाखल करण्यात आल्याची माहिती पोलिसांकडून देण्यात आली.
गौरी धनू बोगाटी हिची प्रकृती चिंताजनक असल्याचेही सांगण्यात आले. दरम्यान, निरीक्षक सिताकांत नाईक यांच्या मार्गदर्शनाखाली चौकशी सुरु करण्यात आली आहे.