वास्को: दाबोळी विमानतळाच्या बाहेरील रस्त्यावर उभ्या असलेल्या 20 वर्षीय तरुणीला जबरदस्तीने टॅक्सीत कोंबून नंतर तिला एका अज्ञात स्थळावर नेऊन तिच्यावर बलात्कार केल्याप्रकरणी वास्को पोलीसांनी ४८ वर्षीय टॅक्सी चालक रवीचंद्रन शिवकुमार भट याला अटक केली आहे. गुरुवारी (28 जून) संध्याकाळी त्या तरुणीवर बलात्कार झाल्यानंतर रात्री तिने त्वरित येऊन याबाबत पोलिसात तक्रार दिल्यानंतर रवीचंद्रन याला गजाआड केल्यानंतर मध्यरात्री त्याला अटक करण्यात आली.
वास्को पोलीस स्थानकाच्या महिला पोलीस उपनिरीक्षक निहंदा तावारीस यांनी दिलेल्या माहितीनुसार टॅक्सी चालक रवीचंद्रन याला महिलेचे अपहरण व बलात्कार प्रकरणी भा.द.स ३६५ व ३७६ खलमाखाली गुन्हा नोंद करून अटक केली आहे. दाबोळी विमानतळाच्या बाहेरील परिसरात एक तरुणी एकटी असल्याचे पाहून रवीचंद्रनने तिला आपल्या इंडिका टॅक्सी (जीए ०७ एफ ०४२८) मध्ये जबरदस्तीने गाडीत घातले. यानंतर तिला अज्ञात स्थळावर नेऊन तिच्यावर बलात्कार केला असल्याची माहिती तावारीस यांनी दिली. बलात्कार झालेली तरुणी महाराष्ट्रातील रहिवास असल्याचे उघड झाले असून ती सध्या फोडा, गोवा येथे राहते. बलात्कार केलेला टॅक्सी चालक रवीचंद्रन हा बोगमाळो, गोवा येथील रहिवासी असल्याचे पोलीसांनी उघड केले आहे. गोव्यातील एका टॅक्सी चालकाने अशा प्रकारे तरुणीचे अपहरण करून बलात्कार केल्याने सध्या हा चर्चेचा विषय बनला आहे.