लोकमत न्यूज नेटवर्क, पणजी : भाजप सरकारमधील भ्रष्टाचाराची पाळेमुळे इतकी खोलवर गेलेली आहेत की आता सरकारमधीलच मंत्री याविरोधात बोलू लागले आहेत, अशी टीका गोवा फॉरवर्ड पक्षाचे अध्यक्ष, आमदार विजय सरदेसाई यांनी केली आहे.
आमदार सरदेसाई यांनी एका 'ट्विट'द्वारे कला व संस्कृती मंत्री गोविंद गावडे यांच्या वक्तव्याचा उल्लेख करत राज्य सरकारवर गंभीर आरोप केले आहेत. मंत्री गावडे यांनी एका कार्यक्रमात म्हटले होते की, कंत्राटदारांना फायली मंजूर करून घेण्यासाठी लाच द्यावी लागते, हे विधान म्हणजेच स्वतः सरकारमधील एका मंत्र्याचा आपल्या सरकारविषयीचा असंतोष असल्याचे सरदेसाई यांनी नमूद केले.
सरदेसाई म्हटले आहे की, हा भ्रष्टाचार काही नवीन नाही. मी गेल्या अनेक वर्षात लहान-मोठ्या अनेक घोटाळ्यांचा पर्दाफाश केला आहे. भाजप सरकारने प्रत्येक खात्यामध्ये भ्रष्टाचाराला प्रोत्साहन दिले असून, राज्यातील प्रत्येक सामान्य नागरिक याची जाणीव ठेवतो. मंत्री गावडे यांनी मुख्यमंत्री प्रमोद सावंत यांच्या अधिपत्याखालील मंत्रालयाबाबत भाष्य केले असल्याने आता मुख्यमंत्री सावंत यांच्याकडून कठोर कारवाईची अपेक्षा आम्ही व्यक्त करत आहोत. ते कारवाई करणार की पुन्हा एकदा हे मंत्रिमंडळ 'राज्यातील सर्वात भ्रष्ट सरकार' हा किताब अभिमानाने टिकवणार? असा प्रश्न करत सरदेसाई यांनी सरकारवर निशाणा साधला.