खाणपट्टा भाजपच्या नवसाला पावला..!

मडगाव : सासष्टीतील मूक मतदारांबरोबर काँग्रेसला खाणपट्ट्याची फोडणीही आवश्यक, असे वृत्त यापूर्वी ‘लोकमत’ने प्रसिद्ध केले होते. खाणपट्ट्यातील असंतोषाचा फायदा करून घेण्यात काँग्रेसला अपयश आल्याचे या वृत्तात नमूद केले होते. शुक्रवारच्या निकालाने त्यावर शिक्कामोर्तब केले. त्रस्त खाणपट्टा भाजपाच्या विरोधात जाईल, अशी काँग्रेसने अटकळ बांधली होती. मात्र, या खाणपट्ट्यानेच भाजपाला तारले. खाणबंदीचा सर्वात मोठा फटका बसलेल्या सावर्डे मतदारसंघाने भाजपाला दक्षिण गोव्यातील सर्वात मोठी आघाडी मिळवून दिली. या मतदारसंघात भाजपाने ११,८४३ मतांची आघाडी मिळविली. या पाठोपाठ सांगे मतदारसंघात भाजपाने ७,५९७ मतांची आघाडी घेतली. कुडचडेत ५,७८८ अशी या खाणपट्ट्यातून तब्बल २५,२२८ मतांची आघाडी भाजपाने मिळविली. या आघाडीमुळेच भाजपा काँग्रेसच्या बाजूने असलेल्या सासष्टीतील आघाडीची बरोबरी करू शकली. सावर्डे पंचायतीचे पंचसदस्य संजय वेळीप यांनी या प्रचंड आघाडीचे श्रेय आमदार गणेश गावकर यांना दिले. सावर्डे मतदारसंघात आमदार गावकर यांनी जी विकासकामे केली, त्याचा फायदा भाजपाला झाला. मोदी किंवा पर्रीकर फॅ क्टरपेक्षा गणेश गावकर फॅक्टर सावर्डेत यशस्वी झाल्याचे वेळीप यांनी सांगितले. ‘आप’चे नेते राजेंद्र काकोडकर यांनी खाणपट्ट्यातील भाजपाविरुद्धच्या असंतोषाचा काँग्रेस हवा तसा फायदा उठवू शकली नाही, असे मत व्यक्त केले. खाणपट्ट्यातून भारतीय कम्युनिस्ट पक्षाला व गोविंद गावडे यांना मते पडतील, अशी अपेक्षा होती; पण तीही फोल ठरली. कुडचडेत भाकपचे राजू मंगेशकर यांना १0९, तर गोविंद गावडे यांना ५६ मते मिळाली. सावर्डेत मंगेशकरांना ३५५ तर गावडेंना २८७, सांगेत मंगेशकरांना २६६ तर गावडेंना ३९५ मते मिळाली. या निवडणुकीत भाकपने एकूण ४,४३७ मते मिळविली. याबद्दल मत व्यक्त करताना आयटकचे अध्यक्ष प्रसन्न उटगी यांनी खाणपट्ट्यातून भाकपला अपेक्षेएवढा प्रतिसाद मिळाला नाही, हे मान्य केले. मात्र, भाकपने खाणपट्ट्याचा मुद्दा आपल्या राजकीय स्वार्थासाठी वापरला नव्हता, याकडेही त्यांनी लक्ष वेधले. (प्रतिनिधी)