लोकमत न्यूज नेटवर्क, पणजी :गोवा मनोरंजन संस्था व माहिती व प्रसिद्धी खात्याच्या सहकार्याने दि. १४ ते १७ ऑगस्ट दरम्यान राज्य चित्रपट महोत्सव होणार आहे. यंदा महोत्सवाची दहावी, अकरावी आणि बारावी आवृत्ती असेल. १४ ऑगस्ट रोजी उद्घाटन होईल तर १७ ऑगस्ट रोजी समारोप सोहळा होणार आहे, अशी माहिती मुख्यमंत्री डॉ. प्रमोद सावंत यांनी दिली.
ईएसजी येथे सोमवारी आयोजित पत्रकार परिषदेत मुख्यमंत्र्यांनी ही माहिती दिली. यावेळी ईएसजीच्या उपाध्यक्ष आमदार डिलायला लोबो, मुख्य कार्यकारी अधिकारी अश्विन चंद्र व शर्मद रायतूरकर उपस्थित होते. काही कारणांमुळे गेली तीन वर्षे चित्रपट महोत्सव झाले नाहीत. यंदा हे सर्व महोत्सव होणार आहेत. दहाव्या आवृत्तीमध्ये १० जानेवारी २०१८ ते ३१ डिसेंबर २०१९, अकराव्या आवृत्तीत १ जानेवारी २०२० ते ३१ डिसेंबर २०२१, बाराव्या आवृत्तीत १ जानेवारी २०२२ ते ३१ डिसेंबर २०२३ यादरम्यान निर्मित झालेले चित्रपट प्रदर्शित केले जातील.
शॉर्ट फिल्म स्पर्धा
मेकॅनिझ पॅलेस आणि आयनॉक्स पणजी येथे हे सर्व चित्रपट दाखविण्यात येणार आहेत. महोत्सवापूर्वी ४८ तासांत शॉर्ट फिल्म तयार करण्याची स्पर्धा होणार असून, चित्रपटाचा विषय महोत्सवादरम्यान देण्यात येणार आहे. यातून निवडण्यात येणारे चित्रपट महोत्सवात प्रदर्शित करण्यात येतील. स्पर्धेतील उत्कृष्ट चित्रपटासाठी प्रथम २५ हजार, द्वितीय २० हजार व वैयक्तीक बक्षिसे दिली जातील.
चित्रपट दोन विभागांमध्ये
महोत्सवात मराठी व कोंकणी चित्रपट दाखविण्यात येतील. या महोत्सवात फिचर फिल्म आणि नॉन फिचर असे दोन विभाग असतील. फिचर फिल्म विभागात मराठी व कोंकणी असे दोन वेगळ्या विभागातून चित्रपट दाखविले जातील. नॉन फिचर फिल्म विभागात दोन्ही भाषेचे चित्रपट प्रदर्शित होतील. इन कन्वर्सेशन सत्र, मास्टरक्लास, मार्केट चर्चासत्र, नॉलेज सिरीज व इतर सत्र होतील.
उत्कृष्ट चित्रपट ५ लाख, तर दिग्दर्शनासाठी ५० हजारांचे बक्षीस
या महोत्सवादरम्यान फिचर फिल्म विभागात पहिल्या दोन उत्कृष्ट चित्रपटांसाठी अनुक्रमे ५ लाख व ३ लाख रुपये, तर पहिल्या दोन उत्कृष्ट दिग्दर्शनासाठी अनुक्रमे ५० हजार व ३५ हजार रुपये देण्यात येणार आहेत. उत्कृष्ट अभिनेता, अभिनेत्री, साहाय्यक अभिनेता, अभिनेत्री, बालकलाकार, कथा, पटकथा, संवाद, संगीत दिग्दर्शक अशी प्रत्येकी २५ हजारांची एकूण २१ २० बक्षिसे देण्यात येतील. नॉन फिचर फिल्म विभागातदेखील एकूण ७ बक्षिसे देण्यात येतील.
चित्रपट अनुदानासाठी ३० अर्ज : डिलायला लोबो
गोमंतकीय चित्रपट निर्मात्यांसाठी असलेल्या चित्रपट अनुदान योजनेसाठी दि. १८ रोजीपासून अर्ज स्वीकारण्याची मुदत सुरू होत आहे. एक आठवड्यापर्यंत अर्ज स्वीकारण्यात येईल. २०१६ -२०२३ पर्यंतच्या वर्षांसाठी सुमारे ३० अर्ज संस्थेकडे आले असून, लवकरच यांची छाननी होईल. त्यानंतर मूल्यांकन समिती चित्रपटांचे मूल्यांकन करून अनुदान समितीमार्फत चित्रपटांना अनुदान देण्यात येईल, अशी माहिती उपाध्यक्षा लोबो यांनी दिली. करण्यात येतील.