पणजी : तिसवाडी आणि फोंडा तालुक्यात गेले सात दिवस लोकांना पाणी न मिळाल्याने सरकारचा निषेध करण्यासाठी प्रदेश काँग्रेसने आज गोवा दौ-यावर येणार असलेले भाजपचे राष्ट्रीय अध्यक्ष तथा केंद्रीय गृहमंत्री अमित शहा यांना मिनरल वॉटरच्या बाटल्या देण्याची तयारी चालवली आहे.
शहा हे पश्चिम विभागीय मंडळाच्या बैठकीस उपस्थित राहण्यासाठी गोव्यात येत आहेत. या बैठकीला गोव्यासह गुजरात, महाराष्ट्राचे मुख्यमंत्री तसेच दमण दीव आणि दादरा नगरहवेलीचे प्रशासक उपस्थित राहणार आहेत. या पार्श्वभूमीवर काँग्रेस प्रदेशाध्यक्ष गिरीश चोडणकर यांनी उपहासात्मकपणे, असे ट्विट केले आहे की. ‘ गेले हात दिवस राजधानी शहरातील नळ कोरडे पडले आहेत. अमित शहा ज्या हॉटेलमध्ये उतरतील तेथेही नळ कोरडे असतील, तेव्हा त्यांना मिनरल वॉटरच्या बाटल्या देण्याची आमची तयारी आहे.’ शुक्रवार १५ पासून राजधानी शहरासह तिसवाडी तालुका तसेच फोंडा तालुक्याला पाणी पुरवठा झालेला नाही. सरकारचे हे अपयश असल्याची टीका चोडणकर यांनी या प्रतिनिधीशी बोलताना केली व या प्रश्नावर मुख्यमंत्र्यांच्या राजीनाम्याच्या मागणीचा पुनरुच्चार केला.