लोकमत न्यूज नेटवर्क
वास्को: भारतीय जनता पक्षाच्या ४३ व्या स्थापना दिनाच्या निमित्ताने मुरगाव मतदारसंघात गुरूवारी (दि.६) विविध कार्यक्रम आयोजित करून स्थापना दिन उत्साहात साजरा केला. भाजप स्थापना दिना निमित्ताने देश आणि गोव्याच्या इतर भागाबरोबरच मुरगाव मतदारसंघातसुद्धा ‘सोशल जस्टीस वीक’ च्या नावाखाली ६ ते १४ एप्रिल पर्यंत विविध कार्यक्रमांचे आयोजन केल्याची माहीती मुरगावचे आमदार संकल्प आमोणकर यांनी दिली.
गुरूवारी मुरगावचे आमदार संकल्प आमोणकर यांच्या सडा येथील कार्यालयात भाजप स्थापना दिनाच्या निमित्ताने खास कार्यक्रमाचे आयोजन केले होते. त्या कार्यक्रमात आमोणकर यांच्याबरोबर गोवा भाजप युवा मोर्च्याचे अध्यक्ष समीर मांद्रेकर, मुरगाव भाजप मंडळाचे अध्यक्ष संजय सातार्डेकर, डॉ. धमेंद्र प्रभूदेसाई, मुरगावच्या नगरपालिकेच्या नगरसेविका श्रद्धा आमोणकर, मुरगावच्या माजी उपनगराध्यक्ष रीमा सोनुर्लेकर आणि इतर मान्यवर उपस्थित होते. भाजप स्थापना दिना निमित्ताने आजपासून पुढचा एक आठवडा मुरगाव मतदारसंघात विविध कार्यक्रमांचे आयोजन केल्याची माहीती आमदार आमोणकर यांनी दिली. ‘सोशल जस्टीस वीक’ च्या नावाखाली ते विविध कार्यक्रम आयोजित केले जाणार असून त्यात स्वच्छता मोहीम, मोफत वैद्यकीय तपासणी शिबीर, वॉल पेंन्टींग अशा विविध कार्यक्रमांचा समावेश असणार आहे. मुरगाव मतदारसंघात भाजप तर्फे ज्योतीबा फुले यांची जयंती साजरी करण्यात येणार असल्याची माहीती आमोणकर यांनी दिली. तसेच १४ एप्रिल रोजी मुरगाव मतदारसंघाच्या सर्व ३० बुथांवर डॉ. बाबासाहेब आंबेडकर यांची जंयती मोठ्या उत्साहात साजरी करण्यात येणार असून त्यानिमित्ताने भव्य मिरवणूकीचे आयोजन करण्यात येणार असल्याची माहीती आमोणकर यांनी दिली. तसेच अन्य विविध कार्यक्रमांचे आयोजन करण्यात येणार असल्याचे त्यांनी सांगितले.
गोवा भाजप युवा मोर्च्याचे अध्यक्ष समीर मांर्देकर यांनी भाजप स्थापना दिनाचे औचित्य साधून मुरगाव मतदारसंघातील भाजप युवा मोर्च्याची समिती जाहीर केल्याची माहीती देऊन शिवप्रसाद महाले यांना अध्यक्ष म्हणून निवडल्याचे सांगितले. गोवा भाजप युवा मोर्च्यांने स्थापना दिनाच्या निमित्ताने पुढच्या एका आठवड्यात गोव्याच्या विविध भागात विविध कार्यक्रमांचे आयोजन केल्याची माहीती दिली. मुरगाव भाजप मंडळाचे अध्यक्ष संजय सातार्डेकर यांनी मुरगाव मतदारसंघात भाजप स्थापना दिना निमित्ताने कार्यक्रमाचे आयोजन केल्याबरोबरच २०२४ सालात होणाºया लोकसभा निवडणूकीच्या तयारीची सुरवात केल्याची माहीती दिली. लोकसभा निवडणूकीत दक्षिण गोव्यातील भाजप उमेदवाराला मुरगाव मतदारसंघातून सर्वांत जास्त मते मिळवून देण्याचे आमचे लक्ष असणार असून त्यात आम्ही यशस्वी ठरणार असा विश्वास संजय सातार्डेकर यांनी व्यक्त केला.