भाजपला ‘न भूतो’ आघाडी

मडगाव : ज्या ‘सायलंट व्होटर’वर काँग्रेसचा विश्वास होता, त्या मूक मतदारांचा कौल या पक्षाला मिळालाच नाही. दक्षिण गोव्यातून भाजपाने ‘न भूतो’ अशी कामगिरी करताना तब्बल ३२,३३0 मतांच्या आघाडीने विजय मिळविला. १९९९च्या निकालाची पुनरावृत्ती करताना भाजपाचे उमेदवार नरेंद्र सावईकर हे प्रचंड आघाडीने विजयी झाले. त्यांनी घेतलेली मतांची आघाडी एवढी प्रचंड होती की भाजपानेही आपल्याला एवढी आघाडी मिळेल, अशी अपेक्षा केली नसेल. नरेंद्र सावईकर यांना १,९८,७७६ मते मिळाली. तर काँग्रेसच्या आलेक्स रेजिनाल्ड लॉरेन्स यांना १,६६,४४६ मते प्राप्त झाली. हे दोन उमेदवार वगळता अन्य उमेदवारांच्या अनामत रकमाही जप्त झाल्या. तृणमूलचे चर्चिल आलेमाव यांना केवळ ११,९४१ मते मिळाली व पहिल्यांदाच गोव्याच्या निवडणूक रिंगणात उतरलेल्या आम आदमी पक्षाने अपेक्षेपेक्षा चांगली कामगिरी केली. त्यांच्या उमेदवार स्वाती केरकर यांना ११,२४६ मते मिळाली. अपक्ष गोविंद गावडे यांना ७,१५२ तर कम्युनिस्ट पक्षाचे राजू मंगेशकर यांना ४,४३७ मते प्राप्त झाली व त्यानंतर जास्त मते मिळविण्याचा क्रमांक ‘नोटा’चा होता. तब्बल ४,0३३ लोकांनी ‘नोटा’च्या बाजूने मतदान केल्याचे मतमोजणीतून स्पष्ट झाले. शालोम सार्दिन यांना २,५८६ मते प्राप्त झाली. इतर पाच अपक्षांची मते आठशे ते पाचशे मतांच्या आत होती. खाणपट्टा, काणकोण, केपे हे भाग भाजपाच्या विरोधात जातील, असा तर्क लढवला जात होता. मात्र, या खाणपट्ट्यानेच भाजपाला सर्वाधिक मते दिली. भाजपाला सर्वाधिक आघाडी खाणबाधीत सावर्डे मतदारसंघातून मिळाली. या मतदारसंघात सावईकरांना १६,२४३ मते मिळाली, तर काँग्रेसचे आलेक्स रेजिनाल्ड लॉरेन्स केवळ ४,४00 मते घेऊ शकले. सावर्डेत भाजपाला ११,८४३ मतांची आघाडी मिळाली. सांगेतही भाजपाने ७,७१४ मतांची प्रचंड आघाडी मिळवली. कुडचडे मतदारसंघात ५,७८८ आणि काणकोण मतदारसंघात ५,९0६ मतांची आघाडी भाजपाला मिळाली. मडकई मतदारसंघात भाजपाच्या सावईकरांना मिळालेली आघाडी ११,१४३ मतांची होती. सावईकरांनी १४,0५६ मते या मतदारसंघातून घेतली. तर काँग्रेसला केवळ २,९१३ मते प्राप्त झाली. त्या पाठोपाठ गोविंद गावडेंनी येथे २६,६६९ मते घेतली. मुरगाव मतदारसंघाने काँग्रेसला मदतीचा हात दिला नाही. काँग्रेसचा बालेकिल्ला असलेल्या कुठ्ठाळीत भाजपाने ६३६ मतांची आघाडी घेतली. मुरगाव मतदारसंघात ३,६४९, दाबोळी मतदारसंघात २,२९५ तर वास्को मतदारसंघात २,६0५ अशी एकंदर या मुरगाव तालुक्यातून १0,१७५ मतांची आघाडी भाजपाने घेतली. भरवशाचा सासष्टी तालुका काँग्रेसबरोबर काही प्रमाणात राहिला. या तालुक्यातील आठ मतदारसंघांतून काँग्रेसला १९,१९0 मतांची आघाडी मिळाली. मडगाव व फातोर्डा हे दोन मतदारसंघ वगळता, इतर सर्व मतदारसंघांत काँग्रेस आघाडीवर होते. वेळ्ळीने काँग्रेसला ८,१0५, नुवेतून ७,५९७, नावेलीने २,१९0, बाणावलीने ५,0५८ तर कुंकळ्ळीने ७५0 मतांची आघाडी दिली. फातोर्डात भाजपाला ४३८ आणि मडगावात १,१२८ मतांची आघाडी मिळाली. (प्रतिनिधी)