वास्को: बुधवारी (दि.२६) संध्याकाळी दक्षिण गोव्यातील साकवाळ येथील महामार्गावर झालेल्या अपघातात ६ वर्षीय कुंदन ध्यानेश्वर राथोड नामक लहान मुलाचा दुर्देवी अंत झाला. कुंदन आणि त्याचे अन्य लहान मित्र महामार्गाचा रस्ता ओलांडताना समोरून आलेल्या एका चारचाकीची धडक कुंदन ला बसल्याने तो गंभीररित्या जखमी झाला. त्याला त्वरित चिखली उपजिल्हा इस्पितळात नेण्यात आले, मात्र इस्पितळात पोचण्यापूर्वीच त्याचा मृत्यू झाल्याचे डॉक्टरांनी घोषित केले.
पोलीस उपअधीक्षक सलीम शेख यांनी दिलेल्या माहीतीनुसार बुधवारी संध्याकाळी ४.३० च्या सुमारास तो अपघात घडला. झरी, झुआरीनगर येथे राहणारा कुंदन राथोड नामक लहान मुलगा बिट्स पिलानी बाहेरील महामार्गाचा रस्ता ओलांडण्याच्या प्रयत्नात होता. त्याच्याच वयाच्या त्याच्या इतर मित्रांनी रस्ता ओलांडला अन् कुंदन रस्ता ओलांडण्याच्या प्रयत्नात असतानाच समोरून आलेल्या चारचाकीची त्याला जबर धडक बसली. चारचाकीची धडक बसल्याने ६ वर्षाचा कुंदन गंभीररित्या जखमी झाल्याने त्याला त्वरित चिखली उपजिल्हा इस्पितळात नेण्यात आले.
मात्र इस्पितळात पोचण्यापूर्वीच त्याचा मृत्यू झाल्याचे डॉक्टरांनी घोषित केल्याची माहीती पोलीस उपअधीक्षक सलीम शेख यांनी दिली. कुंदन याला धडक दिलेल्या त्या चारचाकी चालकाचे नाव कपील बेटगीरी असे असल्याची माहीती पोलीस उपअधीक्षक शेख यांनी दिली. वेर्णा पोलीसांना अपघाताची माहीती मिळताच त्यांनी घटनास्थळावर दाखल होऊन अपघाताचा पंचनामा केला. तसेच कुंदनच्या मृतदेहाचा पंचनामा करून त्याचा मृतदेह मडगावच्या जिल्हा इस्पितळाच्या शवगृहात पाठवून दिला आहे. वेर्णा पोलीस स्थानकाचे निरीक्षक डायगो ग्राशियस यांच्या मार्गदर्शनाखाली अधिक तपास चालू आहे.