मानधनासाठी पैसा नाही : दहिवडे यांचा सवालधानोरा : जिल्ह्यातील बहुतांशी अंगणवाड्यामध्ये जुने इलेक्ट्रॉनिक वजन काटे आहेत. सदर वजन काटे अंगणवाड्यांमध्ये धूळखात पडले आहे. असे असताना शासनाने तब्बल २५ कोटी रूपये खर्च करून नवे वजन काटे अंगणवाडीसाठी खरेदी केले आहे. वजन काटे खरेदी करण्यासाठी शासनाकडे पैसा आहे. मात्र अंगणवाडी महिला कर्मचाऱ्यांना नियमित मानधन देण्यासाठी शासनाकडे पैसा नाही. वजन काटे खरेदी करण्यासाठी शासनाला पैसा कोठून येतो, असा सवाल अंगणवाडी कर्मचारी संघटनेचे अध्यक्ष प्रा. रमेशचंद्र दहिवडे यांनी उपस्थित केला.धानोरा तालुक्यातील गट्टा येथे सोमवारी अंगणवाडी महिला कर्मचाऱ्यांचा मेळावा कार्यकर्त्या मंदा शेडमाके यांच्या अध्यक्षतेखाली घेण्यात आला. यावेळी प्रा. दहिवडे मार्गदर्शक म्हणून बोलत होते. अंगणवाडी महिला कर्मचाऱ्यांना मानधन वाढ लागू होईपर्यंत संघटनेच्या वतीने शासनाच्या विरोधात लढा सुरू राहील, असेही दहिवडे यावेळी म्हणाले. प्रास्ताविक नभिता मडावी यांनी केले तर आभार पुण्यशीला मेश्राम यांनी मानले. यावेळी पुष्पा गेडाम, जानकी गावंडे, कल्पना भोसले आदींसह गट्टा सर्कलमधील बहुसंख्य अंगणवाडी महिला कर्मचारी उपस्थित होत्या. (तालुका प्रतिनिधी)
वजन काट्यासाठी पैसा येतो कोठून?
By admin | Updated: June 25, 2015 01:57 IST