चिक्की तपासण्यासाठी अन्न व औषध विभागाचे पथक अहेरीत दाखल

तालुक्यातील अंगणवाड्यांना पुरविण्यात आलेल्या चिक्कीच्या पुड्यावर घटक पदार्थ शेंगदाना असे लिहिले असून त्यामध्ये मात्र राजगिराची चिक्की आढळली.

दणका लोकमतचाअंगणवाड्यांची तपासणी : शासनाला अहवाल पाठविणारअहेरी : तालुक्यातील अंगणवाड्यांना पुरविण्यात आलेल्या चिक्कीच्या पुड्यावर घटक पदार्थ शेंगदाना असे लिहिले असून त्यामध्ये मात्र राजगिराची चिक्की आढळली. त्याचबरोबर सदर पॉकेटवर पॅकींगची तारीख नसल्याबाबतचे वृत्त लोकमतमध्ये सोमवारी प्रकाशित होताच अन्न व औषध प्रशासन विभागाचे पथक मंगळवारी अहेरीत दाखल झाले व त्यांनी अंगणवाड्यांमधील चिक्कीची तपासणी केली. सत्तेत आलेल्या भाजपा सरकारने अंगणवाडीतील बालकांना खाद्य पदार्थ म्हणून शेंगदाना व राजगिराची चिक्की पुरविण्याचा निर्णय घेतला. अहेरी येथील अंगणवाड्यांना सुर्यकांता महिला औद्योगिक सहकारी संस्था मर्यादित वेंगुर्ला जि. सिंधूदुर्ग या उत्पादक कंपनीकडून मालाचा पुरवठा केला जात होता. मात्र बहुतांश पुड्यांवर घटक पदार्थ म्हणून शेंगदाना असे लिहिण्यात आले होते. प्रत्यक्षात मात्र पुड्याच्या आतमध्ये राजगिरा असल्याचे दिसून आले. तसेच सदर पुड्यावर पॅकींग केल्याचा दिनांक, बॅच क्रमांक, वजन याबद्दलचा कोणताही उल्लेख करण्यात आला नाही. त्यामुळे काही पालकांमध्ये या चिक्कीबद्दल संशय निर्माण होऊन त्यांनी याबाबत लोकमतच्या प्रतिनिधीकडे तक्रार केली. याबाबतचे वृत्त सोमवारी लोकमतच्या प्रादेशिक पानावर प्रसिध्द झाले. सदर वृत्त वाचल्यानंतर बालकल्याण तसेच अन्न व पुरवठा विभाग खळबळून जागा झाला. आयुक्तांनी चौकशीचे आदेश अन्न व औषध प्रशासनाला दिले. गडचिरोली येथील अन्न सुरक्षा अधिकारी चहांदे यांच्यासह दोन अधिकारी मंगळवारी अहेरी येथे दाखल झाले. त्यांनी जिल्हा परिषद शाळेजवळ असलेली अंगणवाडी, धरमपूर येथील अंगणवाडी तसेच इतर अंगणवाड्यांचीही तपासणी केली. मात्र अंगणवाडी सेविकांनी सदर पॉकेट बालकांना वितरित केले असल्याने त्याचे नमुने आढळून आले नाही. त्याचबरोबर अहेरी बाल विकास प्रकल्प अधिकारी आर. डी. मेश्राम या जिमलगट्टा येथे गेल्या असल्याने त्यांचीही भेट होऊ शकली नाही. याबाबतची माहिती मेश्राम यांनी अन्न व औषध विभागाला गडचिरोली येथे येऊन द्यावी, अशी सूचना करून पथकातील अधिकारी गडचिरोली येथे परतले. (शहर प्रतिनिधी)