चामोर्शी पं. स. मध्ये झाली बैठक : १२ सदस्यांचे हात उंचावून मतदानचामोर्शी : चामोर्शी पंचायत समितीचे भारतीय जनता पक्षाचे उपसभापती केशव मसाजी भांडेकर यांच्या विरूद्ध रेवनाथ कुसराम व इतर नऊ सदस्यांनी दाखल केलेल्या अविश्वास प्रस्तावावर बुधवारी विशेष सभेत मतदान घेण्यात आले. १६ पैकी १३ सदस्य या सभेला हजर होते. अविश्वास ठरावाच्या बाजुने १२ तर अविश्वासाच्या विरूद्ध बाजुन एका सदस्याने हात उंचावून मतदान केले. मात्र मुंबई उच्च न्यायालयाच्या नागपूर खंडपीठात याचिका दाखल करण्यात आली आहे. ९ जून रोजी हमदस्त प्राप्त झाल्यामुळे या अविश्वास ठरावाचा निकाल न्यायालयाच्या निर्देशानुसार राखून ठेवण्यात आला आहे. २५ मे २०१५ रोजी पं. स. सदस्य रेवनाथ कुसराम व इतर नऊ सदस्यांनी अविश्वास ठराव दाखल केला होता. त्यानुसार बुधवारी विशेष सभा दुपारी १ वाजता घेण्यात आली. १६ पैकी १३ सदस्य या विशेष सभेला हजर होते. यावेळी अविश्वास प्रस्तावाच्या बाजुने रेवनाथ कुसराम, मनमोहन बंडावार, रंजना कुमरे, मनीषा दुधबावरे, मिनाक्षी देवगडे, प्रमोद भगत, किरण कोवासे, कल्पना कोडापे, नुमचंद भिवनकर, सुरेंद्र सोमनकर, रूपाली निखाडे, सावित्री हरामी यांनी हात उंचावून मतदान केले. तीन सदस्य गैरहजर होते. तर विरूद्ध बाजुने केशव भांडेकर यांनी मतदान केले. या अविश्वास ठरावाच्या विशेष सभेचे पिठासीन अधिकारी म्हणून उपविभागीय अधिकारी जी. एम. तळपादे, नायब तहसीलदार एस. के. चडगुलवार, ना. त. जाधव यांनी काम पाहिले. (शहर प्रतिनिधी)
अविश्वास प्रस्तावाला स्थगिती
By admin | Updated: June 11, 2015 01:46 IST