बसगाड्या व वाहक कमी असल्याचा परिणाम : तास-दीड तास उशिरा पोहोचत आहेत बसगाड्यागडचिरोली : सुरक्षेची हमी देणारा प्रवास म्हणून राज्य परिवहन महामंडळाच्या बस प्रवासाकडे पाहिले जाते. मात्र गेल्या सहा-सात दिवसांपासून गडचिरोली आगाराच्या अनेक बसगाड्या शैक्षणिक सहलीकरीता बुकींग होत आहेत. तसेच वाहकाच्या कमतरतेमुळे एक ते दीड तास बसगाड्या उशीरा पोहोचत आहे. एसटीचे दैनंदिन वेळापत्रक कोलमडल्यामुळे प्रवाशांना त्रास सहन करावा लागत आहे.महामंडळाच्या गडचिरोली आगाराकडे एकूण १०७ बसगाड्या आहेत. या आगाराचे दैनंदिन १०६ शेड्युल आहेत. सद्य:स्थितीत गडचिरोली आगाराच्या बस वाहतूक व्यवस्थेकरीता २३० चालक व २०७ वाहक आहेत. यापैकी चार ते पाच वाहक निलंबित करण्यात आल्यामुळे वाहतूक व्यवस्थेवर नाहीत. तर चार ते पाच चालक व वाहक दिर्घ आजाराच्या रजेवर आहेत. याशिवाय दररोज २० ते २२ चालक वाहक साप्ताहिक विश्रांती असतात. गडचिरोली आगाराकडे दैनंदिन शेड्यूलच्या अनुषंगाने चालकाची संख्या पुरेशी आहे. तर ३० ते ३५ वाहकांची रोजच कमतरता भासते. हिवाळा असल्याने शैक्षणिक सहलीचा उपक्रम जोमात सुरू आहे. याकरीता गडचिरोली आगाराच्या अनेक बसेस अधिग्रहीत केल्या जातात. २० डिसेंबरला ४, २१ डिसेंबरला ४, २२ डिसेंबरला ४, २३ डिसेंबरला ५, २४ डिसेंबरला ८, २५ डिसेंबरला ३, २६ डिसेंबरला ५, २७ डिसेंबरला २, २८ डिसेंबरला ३, ३० डिसेंबरला ४, २ जानेवारीला ३ व ३ जानेवारीला ३ बसेस बुकींग करण्यात आल्या होत्या. तर उद्या ५ जानेवारीला ३ बसेस शैक्षणिक सहलीसाठी बुकींग करण्यात आल्या आहेत. भौगोलिक वाहतुकीचे क्षेत्र अधिक असून दैनंदिन शेड्युल मोठ्या प्रमाणात आहे. मात्र या तुलनेत गडचिरोली आगाराकडे बसगाड्या उपलब्ध नाहीत. त्यामुळे आगार व्यवस्थापकाला काही दैनंदिन शेड्यूल रद्द करावे लागतात. चालकांच्या कमतरतेमुळे बसगाड्या वेळेवर सोडण्यासाठी तसेच पोहोचण्यासाठी उशीर होतो. मानव विकास मिशनच्या गडचिरोली आगाराकडे एकूण ३५ बसगाड्या आहेत. विद्यार्थ्यांच्या सुरक्षिततेच्या दृष्टीकोणातून या बसगाड्यांची वेगमर्यादा बांधून देण्यात आली आहे. सध्या या बसगाड्या ४५ ते ५० या वेग मर्यादेत धावत आहेत. त्यामुळे सदर बसेस पोहोचण्यासाठी विलंब होत आहे. (स्थानिक प्रतिनिधी)
एसटीचे वेळापत्रक कोलमडले
By admin | Updated: January 4, 2015 23:10 IST